БилингваБилингвизмъя удмурт центрВиктор Васильевич Туганаевлэн кыр турын-куаръёс сярысь веросъёсыз
Веросъёс кутэмын Туганаев В.В. Коля тодэ 50 будэсэз, нош тон?..: Веросъёс / В.В. Туганаев. ‒ Ижевск: Удмуртия, 1988 книгаысь
Пыштурын
Коля песянаез сьӧры гурезь бамалэ тубиз. Татын, сусыпуо интыын, пыштурын будэ, пе. Солэсь чай пӧзьто. Песянаез шуэ, пыштурын, пе, адямиез пӧсятэ но мугорысьтыз кынмемзэ улля. Озьыен, со чайлы гинэ уг яра, эмъюм но луэ.
Коля пыштурын дорозь вуиз но шуак шып кариськиз. Адӟиз со, кызьы пыштурын сяськаос вылэ кык мушъёс пуксизы. Нош тани отчы вуиз чебер но секыт мугоро майсы. Пыдъёсыныз но нырыныз сяськаос полын бугыръяськиз но йыркуръяськыса выллем кытчы ке лобӟиз. Та интые ик капчи лэзиськиз лыз бурдо бубыли.
Коля мукет пала учкиз но пыштурынлэн модостӥз тубись кузьылиосты адӟиз, нош куар вылтӥз, саженен мертаськем выллем, шаплы ортчиз векчи но кузь мугоро вож нумыр.
‒ Песянай! ‒ вазиз Коля. ‒ Пыштурын адямилы гинэ дуно вылымтэ. Со кулэ вылэм мушъёслы, майсыослы, кузьылиослы, бубылиослы но нумыръёслы.
‒ Озьы, пие, озьы, соин ик пыштурынэз уно тӥяны уг яра. Я, тани мон пуйыме тырмытӥ ини. Ойдо, дор пала вырӟомы.
Узы
Узы ‒ пичи гинэ будос, вож куаръёсыз куинь люкето. Векчи модосъёслэн йылазы ик горд-горд емышъёссы пишто. Соослэн секытсылы чидатэк, векчи модосъёс буко выллем куасалтӥсько, узыос будосэз юромо чеберъян понна ошемын, кожалод.
Коля узыез лякытэн, эскериськыса басьтэ. Сое веръямез потэ ке но, кружкаяз понэ. Со тодэ угось ‒ дораз вуиз ке, песянаез узыен но йӧлын сюдоз.
Песянаез узылэсь куаръёссэ но бича. Толалтэ, сое парыса, чай юэ. Со, пе, адямилы кужым сётэ. Ӝытъёсы Коляез но секта таӵе чаен. «Me, ю та эмъюмез», ‒ шуэ со. Узыен чай, оло, зэмзэ но эмъюм выллем, малы ке шуоно, Коля толалтэ ӧз висьылы на.
Узылэсь варенье но туж ческыт. Банкаез усьтӥськод но, нюлэс зын корка тыр вӧлме. Колялэн соку ик син азяз пуксе Туймы сьӧрысь сьӧд нюлэс, ӝужыт кызъёс но пужымъёс, нош нюлэс пушкын пумтэм-йылтэм горд-горд узыос пишто.
Боры
Боры узылэсь бадӟымгес но, юнгес но. Сое бичаны но каньыл. Ма, узыен ӵошатоно ке, борылэн чырсэз но ӧжытгес. Соин, вылды, Колялэн эшъёсызлы боры ческытгес потэ. Нош Колялы одӥг кадь кельшо боры но, узы но.
Песянаеныз соос борылы Чебернюк пала ветло. Татын кык пӧртэм боры пумиське ‒ тӧдьы кисьмасез но горд кисьмасез. Тӧдьыезгес кузь турын пушкын но куакъёс улын будэ, шундылэсь ватӥськыса, нош гордэз ‒ шундыё бамалын.
Писэйкӧжы
Коргид вӧзы интыяськем будослэсь нимзэ Коля толон гинэ тодӥз. Песянаез вераз: со, пе, писэйкӧжы.
Коля соку ик син азяз пуктӥз таӵе суредэз: трос кузя люкаськем писэйёс, асьсэос вал интые кыткиськыса, музъемез пичи герыен гыро-усыяло, собере му вылэ писэйкӧжылэсь тысьёссэ пазяло. Бӧрысьгес жаг турынэз уро, нош кӧжылэн емышез вуэм бере, сое турнало-арало, кӧжыен ӝук пӧзьто. Адямиос сямен ик, ӝӧк сьӧры пуксьыса, пуньыен сисько.
‒ Песянай, нош писэйёс кӧжыен ӝукез ярато-а?
‒ Уг, пие. Соослы йӧл, йӧлвыл кельшегес. Сӥлез но ярато, нош шыр кутылонэз соос номырин но уз воштэ.
‒ Нош малы та будосэз соку писэйкӧжы шуо?
‒ Писэй сямен ик адямиос вӧзы кариськемез понна, дыр. Собере учкы ай, солэн куаръёсыз ӧжытак писэйлэн пыдъёсызлы кельшо, ‒ песянаез одӥг куарез ишкалтӥз но внукезлы сётӥз. ‒ Нош тодӥськод-а, пие, писэйкӧжылэсь емышсэ сиыны яра шуыса? Я тани веръя ай!
Пичи бирдылы кельшись писэйкӧжылэн мульыосыз Колялы зэмзэ но кельшизы. Со ачиз соосты кӧня ке бичаз но писэйзэ ӧтиз:
‒ Машка, Машка, кис-кис!
Тани Коля доры выж улысь пурысь писэй вуиз.
‒ Me, си асьтэлэсь кӧжыдэс! ‒ мычиз со Машкалэн ныр улаз писэйкӧжы мульыосты. Нош Машка Колялэсь ӵектэм сиёнзэ кӧня ке зынъяз но, йырыз кур луыса выллем, берен выж улэ пыриз.
‒ Зэмзэ ик писэйкӧжы солы чик кулэ вылымтэ, ‒ малпаз Коля. ‒ Солы шыр кулэ, дыр, уть кыӵе дыртыса выж улэ пегӟиз.
Ӟуч сямен писэйкӧжыез «просвирник приземистый» шуо.
Вожпот
Коля песянаез сьӧры пушнерлы мынэ. Со бакча берын нап-нап ӝужамын. Та куэз пульсатӥсь будосэз песянаез векчи-векчи кора но, пызен яке комбикормен сураса, чӧжъёслы сётэ. Чӧжъёс, эсьма, вожомыса ик сиё та сиёнэз. Коля яратэ соку чӧжъёс шоры учкыны. Уть соос кыӵе дыртыса кокчало сиёнэз. Тусез син куспын бушато, ява.
Ферма дортӥ пичи сюрес ортче. Со котырын кыӵе ке валантэм, юн модосо турын будэ. Колялэсь со кык пол ӝужытгес луоз, турын пӧлы пырид ке, чаляк йыромод.
‒ Песянай, учкы ай, кыӵе удалтэм та будос! Малы сое нокин но уг турна?
‒ Вожпот со, пие. Ӝоген кусо яке сюрло со доры но вуоз.
‒ Вожпот? ‒ пайме Коля. ‒ Нош малы асьмелэн бакчаямы со таӵе ӝужыт ӧвӧл?
‒ Бакчаямы сое асьмеос уриськомы уга. Пичиосыз гинэ куд-ог дыръя кылё. Нош татын солы нокин но уг люкеты, будэ, кӧня быгатэ.
‒ Нош малы ке яра-а вож пот?
‒ Война дыръя ми сое мешокен люкаськомы вал. Сӥзьыл ке вуэ, ю-нянез выллем араллямы, куасьтылӥмы но кутсаллямы. Тысьёсыз вожпотлэн векчиесь, маклэсь ӧжыт гинэ тазагес, оло. Сое ми изӥськомы вал но, ӟег пызен сураса, кӧмеч яке нянь пыжиськом.
‒ Ческыт шат вожпотэн нянь?
‒ Ческытэз сыӵегес ини, нош сютэм аръёс дыръя кызьы ке но улоно вал ук. Али вожпотэн сюдӥськомы курегъёсты, ӟазегьёсты, чӧжъёсты. Парем вожпот тысез пызен сураса сётъяськод ке, соос чаляк куаё.
Доразы бертыку, Коля вожпотлэсь веник тӥяз но ӝыт, пудооссы возь вылысь бертэм бере, нырысь ик сое веръяны сётӥз скаллы, собере ыжъёслы. Соос кӧня ке гинэ сиизы. Бератаз песянаез валэктӥз ‒ вожпотэз мукет турын-куарен сураса сётыны кулэ шуыса. Соку гинэ пудо-животъёс сое ческыт карыса сиё.
Ӟуч сямен вожпотэз «марь» шуо, куддыръя «лебеда». Нош лебеда ‒ соиз ини мукет будос. Со сяна, пумиськылэ на тӧдьыпот нимоез но. Сое ӟучъёс «полынь горькая» шуо.
Сьӧдмульы
‒ Мон сьӧдмульыен пирог пыжи, тани веръя ай, пие, ‒ Колялы вазиське песянаез.
‒ Кыӵе-сыӵе сьӧдмульыен?
‒ Ма, мон тыныд возьматӥ вал ук ини сое. Аналтэм парник бервылысь тӧдьы сяськаё но сьӧд мульыё будосэз вунэтӥд-а?
‒ Со сьӧдмульыез сиыны яра шат?
‒ Кисьмаса вуэмын ке, яра. Нош тужгес но умой соин пирог яке перепеч пыжыны.
‒ Нош малы мон азьло сыӵе пыжиськемдэ ӧй тодылы?
‒ Али юромо пыжи, тыныд веръятон понна. Кемалась ини, мыным соку куать-сизьым арес сяна, ӧй вал, эмезь но, сутэр но ӧз удалтэ. Со аре ми сьӧдмульыез бичамы. Соосты сиыны яра ке, малы бен уд бича? Ческытгес мед луоз шуыса, сьӧдмульыез пӧсь вуэн миськыны кулэ. Сотэк, трос сииськод ке, йыр висьыны кутске.
Сиськем бераз Коля азбаре потӥз но юртъер котыртӥ сьӧдмульыосыз чакласа ветлӥз. Собере бакчае пыриз, чаклаз кияр но помидор убоосты. Зэмзэ но, сьӧдмульы ӵем пумиське вылэм, нош азьло соосты ӧз но адӟылы кадь.
Песянаез Колялы вераз, сьӧдмульылэн, картофкалэн но помидорлэн сяськаоссы но мульыоссы огзылы огзы туж кельшо шуыса. Картофкалэн сяськаез бадӟымгес сьӧдмульылэн сярысь, помидорлэн ‒ ӵуж буёло, нош мульыоссы быдӟалаен но, буёлэн но пӧртэм: картофкалэн вож, вишня быдӟа, помидорлэн эшшо но бадӟымгес луэ. Кисьмакуз со яке гордэктэ, яке ӵужектэ, сьӧдмульылэн емышез сутэрлы кельше тусызъя но, быдӟалаезъя но.
Вераны кулэ на сьӧдмульылэсь нимъёссэ но: сьӧд куакасутэр, пуныльӧм, туривесь. Ӟуч сямен сое «паслён чёрный» шуо.
Туспуктэм кутэмын:nmedik
Италмас
Италмас сярысь Коля выжыкыл тодэ. Вашкала дыръёсы улэм-вылэм Италмас нимо егит ныл. Огпол сое сьӧсь адямиос лушканы малпаллям. Италмас сяськалы пӧрмытскем. Тӥни со дырысен возь вылын будӥсь чебер, пичи толэзьлы кельшись сяськаез италмас шуо.
Италмасэз адӟыса, Колялэн син азяз чебер ныл пуксе: ӵуж-ӵуж йыркышетэн но вож-вож дэремен.
Пыдултурын
Шыртари, шыркенэм, ӟольгыри кеньыр ‒ кыӵе но нимыз ӧвӧл та огшоры, ӵем пумиськись будослэн.
Огпол Коля таӵе суредэз адӟиз: гуждор вылэ уллёен ӟольгыриос пуксизы но куспазы ӟильыртыса лӧскатыны кутскизы ук та турынлэсь тысьёссэ.
‒ Песянай, учкы ай, ӟольгыриос мае озьы сиё? ‒ бызьыса корка пыриз Коля.
Песянаез укноетӥ азбаре учкиз но соку ик валаз, мар даурто ӟольгыриос:
‒ Э-э-э! пыдултурынлэн тысьёсыз вуиллям, соосты ӟольгыриос укыр ярато. Уть кыӵе чакласькыса гуждорез кокчало, кинлэсь ке курдало кожалод.
Озьы ик вань. Шӧдтэк шорысь отчы писэй вуиз. Ӟольгыриос шуак омыре ӝутскизы но липет йылэ интыяськизы. Коля азбаре бызьыса потӥз но писэез улляз.
‒ Эн люкеты ӟольгыриослы, соослэн но сиемзы потэ! «Нош кыӵе меда пыдултурынлэн тысьёсыз?» ‒ аслыз ачиз юан сётыса ишкалтӥз со одӥг будосэз.
Пыдултурынлэн модосэз но, выжыез но юнэсь, куаръёсыз пичиесь гинэ. Куаръёс но модосъёс вискын тӧдьы яке лемлет буёло векчи сяськаос пуко, вуэм тысьёс но адӟисько ини. Коля одӥг тысез поттӥз но котыр ласянь эскериз сое. Тысь пичи гинэ, куинь сэрего. Тани мае ярато вылэм ӟольгыриос.
Песянаез вера, та пыдултурынэз пудо-живот но яратэ шуыса. Нош солэн выжыезлэсь азьло лыз буёл потто вылэм.
Ӟуч сямен та будосэз «горец птичий» яке «спорыш» шуо.
Игоня
‒ Map со игоня? ‒ юаз эшезлэсь Коля.
‒ Сыӵе ческыт будосэз уд тодӥськы шат? Кылем арын иншыр пала сое бичаны юри ветлӥмы, ‒ валэктыны выре Валентин.
‒ Сое игоня уг шуо ук, со ‒ курыттурын.
‒ Ӧвӧл, ӧвӧл. Мынам нэнэе игоня шуэ.
‒ Ойдо, мон песянаелэсь юало.
Пиналъёс Коля доры пыризы. Песянаез тазьы валэктӥз: курыттурынэз мукет сямен игоня, пе, шуо. Вань на солэн мукет нимыз но ‒ сибыртурын, ӟучгумы, ческыт модосо будос. Ӟучъёс сое «свербига» шуо.
Тани Коля эшъёсыныз иншыр пала мынӥзы. Зэмзэ но, люцерна бусыын курыттурын будэ вылэм. Сое юри кизиллям кожалод. Курыттурынлэн али сяськаез ӧвӧл, соин ик модосэз небыт но ческыт. Нош сое сиён азьын куэзлэсь палано.
Пиналъёс сумкаоссэс чаляк тырмытӥзы но доразы бертӥзы. Курыттурын ческыт ке но, сое трос уд сиы ‒ курытэз шодӥське.
Ӵуж но льӧль сяськаё йӧныос
Коля сайкаку, коркан нокин ӧй вал. «Песянай бакчаын луоз. Толон уриськон сярысь вераз вал», ‒ таӵе вераськонэз тодаз ваиз Коля.
‒ Песянай! ‒ бакчае потӥз со. ‒ Мон мисьтӥськи но, сиськи но ини, тыныд юрттом-а?
‒ Тани та ишкем жаг турынэз кенос доры нуллы ай!
Коля ужаны кутскиз. Киосаз куд-ог турын-куаръёслэн веньёссы бышкаллясько.
‒ Песянай, киы вӧсь луэ.
‒ Э-э-э, чылкак вунэтӥ ук мон! ‒ ассэ тышкаське Марпапай. ‒ Кенос дорын пӧзьы вань, басьты.
Пӧзьыен ужаны капчи луиз. Коля жаг турынэз бугыръяса чаклаз: «Тани со бышкаськись жаг турын» ‒ адӟиз со вене будосэз.
‒ Песянай, кызьы нимало та бышкись будосэз? ‒ юаз Коля.
‒ Йӧны со.
‒ Йӧны? ‒ паймиз Коля. ‒ Солэн сяськаез ӵуж ук!
‒ Вань кык пӧртэм йӧныос ‒ одӥгезлэн сяськаез льӧль буёло, мукетызлэн ӵуж. Тани, учкы ай, ‒ возьматӥз со небыт куаро ӝужыт будос шоры. ‒ Таиз ӵуж сяськаё йӧны, нош соин артэ ик льӧль сяськаёез будэ.
‒ Кудзы соос пӧлысь тросгес люкето картофкалы?
‒ Кыкназы ик соос акылесэсь. Бакчаын но, бусыын но. Выжыоссы соослэн музъеме мур ватскемын, соин ик бакчаез ӵем уроно луэ.
Пунысюл
‒ Тон мар сыӵе бадӟым гу лэсьтӥськод? — юаз Колялэсь песянаез.
‒ Пунысюл выжылэсь пумзэ адӟеме потэ, ‒ ужзэ куштытэк ик, йӧн-йӧн вазиз Коля.
‒ Солэн выжыез кыдёке музъеме кошке, пумозяз уд вуы. Соин ик солэсь кужымзэ ӵем урыса гинэ лябӟытоно.
‒ Паймисько мон пунысюллы, ‒ лопатказэ куштыса вераз Коля, ‒ сыӵе чебер сяськаосыз, нош кыӵе люкетэ картофкалы будыны.
‒ Сыӵе солэн сямыз. Модосэз лябен бинялтӥське мукет будосъёс котыре.
‒ Песянай! ‒ паймыса юаз Коля.‒ Нош малы пунысюллэн сяськаосыз ворсаськиллям?
‒ Куазь сӧриськон азьын со озьы луэ. Я, ойдо, куасьмем турынмес липет сиге ӝоггес ӝуткаломы. Куазь пильмаськыны ӧдъя.
‒ Кыӵе умой луысал, пунысюл кыр интыосын гинэ будысал ке! ‒ малпа Коля.‒ Куштэм интыос чебер луысалзы, нош бакча емышъёс эркын будысалзы.
Люгы
Коргид сьӧрын будӥсь люгы Колялэсь но ӝужыт луиз но лемлет сяськаосын шобырскиз. Куаръёсыз сокем бадӟымесь, соос улэ зорлэсь но ватскыны луысал. Модосэз зӧк но юн, чигтыны луонтэм.
Колялэн песянаез люгыез йӧтылыны уг лэзьы. «Ӝоген, ‒ шуэ со, ‒ мон солэсь выжызэ гудыса потто, кезьыт вуэн миськем берам кузэ пуртэн нио но куасьто. Собере сое пӧзьто но вуэныз йырез мисько. Эмъюм но лэсьтыны луэ та выжылэсь».
Песянаез ма но уг тоды люгы сярысь. Люгыез, пе, куд-ог интыын арыкман шуо.
Люгы кык ар улэ. Нырысетӥ аре ӝужыт уг луы, музъем вылэ жиптӥськыса будӥсь куаръёс гинэ кылдытэ, нош мукет араз бадӟым но чебер будослы пӧрме, сяськаяське но тысь поттэ.
Урботурын
‒ Тани та кӧш зыно будосэз урботурын шуо, ‒ сюрес дурысь лапег будосэз выжыеныз ишкалтыса возьматӥз Колялы песянаез.
‒ Со урбоослы-а, мар-а кулэ? ‒ паймиз Коля.
‒ Ӧвӧл. Тани учкы ай умойгес, соку ик валалод, малы тае урботурын шуо.
‒ Зэм но, тысь пуртэсъёсыз чылкак урболы кельшо, туссы гинэ вож! ‒ валатскиз Коля.
Собере Коля малы ке но шумпотыса тэтчаны кутскиз.
‒ Map луиз тонэн, пие? ‒ табере песянаезлэн паймыны черодэз вуиз.
‒ Шумпотӥсько, песянай: эшшо одӥг будосэз тодӥ.
Шырбыж
Аптека дорын суред ошемын. Отын чебер буёлъёсын суредамын эмъюмлы ярась уно будосъёс. Соос пӧлын шырбыж но вань.
Колялэн анаез шуэ, асьме палан, пе, куинь пумо шырбыж будэ. Одӥгезлэн куаръёсыз кузесь но сюбегесь, кыкетӥезлэн ‒ паськытэсь но волмытэсь, нош куинетӥезлэн куаръёсыз вакчи гонэн шобырскемын. Коля вӧсь луэм интыосаз котьку шырбыж куарез ляке, нош аптекаын, пе, песянаезлэн верамезъя, шырбыжлэсь пӧртэм эмъюм лэсьто.
Шырбыж сяськаяськыкуз куартэм но ӝужыт модосо луэ. Йылаз кузь сюрело сяськаосыз вань. Кыдёкысен солэн модосэз но, сяськаё йылыз но, зэм ик, шыр быжлы кельшо. Соин ик та будосэз калык шырбыж шуэм.
Пушнеръёс
Коля котькуд вамышсэ чакласа, дыртытэк гинэ кенер вылтӥ мынэ. Со карысьтыз усем ӟольгырипилы юрттыны турттэ. Песянаез сое алэ:
‒ Пушнере усёд! Ӟольгырипилы анаез юрттоз!
Озьы ик луиз ‒ Коля пушнер пӧлы шуак усиз но отысь кесяськыса пукыӵньӧл кадь потӥз. Песянаез доры вуыса бӧрдэ ук, бӧрдэ ук! Нош маин юрттод адямилы сыӵе дыръя? Чиданы кулэ. Пульсам интыос висё ке но, ортчоз ай.
Ӝыт пал Коля ӟырданы кутскиз, мылкыдыз уродмиз. Нош ӵуказеяз солы умой луиз. Эшъёсыз Коляез буйгато: ярано коть, шуо, тон небыт куаро пушнере усид. Вань на пичи куаро лек пушнер, вот соиз вӧсь карысал ке карысал!
Пушнер вӧсь ке но каре, Коля со шоры гажаса учке. Пушнеръёслэсь трос пайда басьтыны луэ ук. Вазь тулыс песянаез соин туж ческыт шыд пӧзьтэ. Пушнерен чӧжъёсты, курегъёсты, ӟазегьёсты сюдэ.
Палякатурын но сумка пуртэс
‒ Коля, тани та будосэз тодӥськод-а? ‒ книгаысь суредэз возьматэ песянаез. ‒ Ӟуч сямен сое «ярутка» шуо вылэм, нош ми палякатурын нимаськомы.
Коля суредэз учкиз но бызьыса кыре потӥз. Кӧня ке улыса, со кияз будосэн пыриз.
‒ Тани со палякатурын, со асьмелэн бакчаямы мунчо дорын будэ.
‒ Нош таиз, ‒ мукет страницаысь суредэз возьматӥз песянаез, ‒ сумка пуртэс турын. Зэмзэ но, пуртэсэз сумкалы укша. Со сумкаез усьтӥськод ке, пушкысьтыз уно векчиесь тысьёсты адӟыны луэ.
‒ Сумка пуртэс сюрес дурын но, бакчаямы но туж трос ук, ‒ тодэмзэ вера Коля.
‒ Сумка пуртэсэз кроликъёс ярато. Солэсь эмъюм но лэсьто.
‒ Кыӵе гинэ будосъёс ӧвӧл дунне вылын! ‒ пайме Коля.