БилингваБилингвизмъя удмурт центрВиктор Васильевич Туганаевлэн пудо-живот сярысь веросъёсыз
Веросъёс кутэмын *Туганаев В.В. Нош ик Коля сярысь: Веросъёс. ‒ Ижевск: Удмуртия, 1993 * книгаысь
Азькыл
Ӧд вунэтэ-а Коляез? Соин мон тӥледыз тодматӥ вал «Коля тодэ 50 будосъёсты. Нош тон?» книгаям. Котьмае тодыны тыршись тямыс аресъем пияш со. Коля улэ гуртын. Анаез скал кыскисьын ужа, атаез ‒ тракторист. Сое ӵемгес песянаеныз, Марпапаеныз, адӟыны луэ. Лякыт сямо Марпапай яратоно внучокезлэн пумтэм юанъёсызлы тунсыко валэктонъёс шедьтэ, солэсь ужаны но тросгес тодон-валанъёс басьтыны мылкыдзэ ӝутэ. Коля эшъяське Валентинэн. Соос ярато инкуазез, пудо-животъёсты, олокыӵе но шудонъёсты тодо.
Ӵукна со одӥг дыре иземысь султэ, валессэ тупатэ, анай-атаеныз, песянаеныз ӟечбуръяське. Уг вунэты зарядка но лэсьтыны. Ӝӧк сьӧрын пукыкуз уг дырты, нош сиськем бераз, тусьты-пуньызэ ачиз ик пӧсь вуэн гылтэ. Сo котьку но чылкыт дӥсяськемын.
Колялы ваньмыз тунсыко потэ: мар со кизилиос, шунды, кытын но кызьы кылдо пилемъёс, малы тол бере тулыс вуэ, кытын толъё тылобурдоос...
Коля тунсыкъяське будосъёсын но, лулосъёсын но. Яратэ песянаеныз но Валентинэн ӵош нюлэсъёстӧ, возь вылъёстӥ яке шур кузя ветлыны.
Нош кыӵе меда лулосъёсты Коля тодэ? Ойдолэ, пиналъёс, та чебер книгаез йылысеныз пумозяз лыдӟом но эшшо огпол Коляен но со котырысь дуннеен тодматском.
В. Туганаев
Пудо-животъёс
Вал
Валъёслэн улон-вылонзы капчи ӧвӧл. Кыӵе гинэ ужъёсты соослы быдэсъяны уг кылды: бакчаосыз гыро, ю тысен мешокъёсты нулло, нюлэскысь кор поттало, бусые кыед вортто, турын но куро ваё... Коля азьло ӧз валалля, кызьы сыӵе кужмо лулосъёс адямилэсь кылӟисько шуыса. Адямиос соос кадь ик кужмоесь ӧвӧл ук! Алигес гинэ тодӥз со, адямилэн кужмыз йырвизьмаз шуыса. Валъёслэн валанзы адямилэн мында ӧвӧл, соин соосын кузёяськыны луэ. Озьы ке но, валъёс туж умой шӧдо кузёзылэсь сямзэ но выроссэ. Ӟеч сюлэмо кузёзэс соос ярато, нош урод муртлэсь палэнтӥсько. Колялэн лыктэмезлы Тропик котьку шумпотэ. Тодэ, луоз, Коля сое вешалоз но ӟепысьтыз сезьы тысен утялтоз шуыса. Тропик соргетыса сие Колялэсь кузьымзэ. Пияшлэн шӧдэмезъя, вал солы озьы тау каре.
Скал
Ижын быдэс толэзь улэмез бере, Коля дораз бертӥз. Песянаез шумпотэменыз сое кытчы пуктыны но, маин сюдыны но уг тоды ни. Огзэ, мукетсэ пыжоссэ веръяны косэ. Нош Коля "тау" гинэ каре, номыре уг йӧтылы.
‒ Мае бен, пие, сиемед потэ?
‒ Йӧлын ӟег нянь сиысал, песянай. Городын йӧл но, нянь но асьмелэн сярысь мукетгес кадь. дорын соос ческытгес.
Коляослэн Йылсосюр нимо скалзы вань. Сое быдэс семьяен ярато, со понна сюлмасько. Дядяез но нэнэез гужем турын дасяло, песянаез котькуд ӵукна но ӝыт Йылсосюрлэсь йӧлзэ кыске, нош Коля быгатэмезъя ваньмызлы юрттэ. Йылсосюр сое умой тодма, кылзӥське. Ӝыт, пудо-животъёс возь вылысь бертыку, со лыктэ Коля доры. Пияш солы одно ик маке но ческытсэ сётэ. Ма, трос ик ӧвӧл, огпол нюлыштымон гинэ.
Ыж
Ӝоген пеймытскоз ини, нош Коляослэн одӥгез ыжзы доразы ӧз берты. Марпапай сюлэмшугъяськыны кутскиз: «Кион ӧз кеся меда сое?»
‒ Кионъёс гужем шорын пудоосты уг йӧтыло, ‒ буйгатэ сое Колялэн дядяез.
‒ Иське, кытчы луиз со?‒ уг буйгатскы Марпапай.
Песянаезлэн сюлэмшугъяськонэз Колялы палаз. Со Валентин доры мынӥз но, ӵошен кошкизы Чебернюк пала. «Чиге! Чиге! Чиге!» ‒ кесяськыса мыно соос.
‒ Сыл ай! ‒ вазиз Валентин,‒ мон ыжлэсь бӧксэмзэ кылӥ кадь. Зэм ик, пиналъёслэн пель сьӧразы ыж бӧрдэм куара чузъяськиз: «Бе-е-е!» Мискинь, кенераме пырем но ‒ потон сюресэ ыштэм. Пиналъёс кенерлэн пась дораз султыса гинэ вуизы, ыж соос доры бызьыса лыктӥз.
Пуны
Коля но Валентин чорыганы мыно. Мылкыдзы лӧптэмын, соин ик тэтчамзэс но уг шӧдо. Шумпотэмзылэн мугез валамон ‒ быдэстэмын кык класс. Коля куинетӥяз выжиз «витьёсын» гинэ, нош, Валентинлэн кӧня ке «ньыльёсыз» но вань. Азьпалан табере куинь ялкарон толэзьёс, нош али шунды пиштэ, капчи, ыркыт тол бамъёссэс но мугорзэс маялля. Пиналъёс визнаны ярато. Кин тодэ, оло, шуд усёз бадӟым чорыгез кутыны. Коляен Валентин шоры учкыса, Лусьтро но туннэ шумпотэ, лэся. Со пиналъёсын ӵош тэтча, палэнэ бызьыса кошке но уйжомем кадь вуэ эшъёсыз доры. Пуныослэн сыӵе уга сямзы: кузёзылэн мылкыдыз каньыл ке, соос но шумпото. Юнме шорысь-а ма пуныосты адямилэн тужгес но матысь эшез шуо.
Кеч
Ӝыт пал, пудо дораз бертыку, уллёлэн азьпалаз котьку сямен бызё кык кечъёс ‒ Лукерья апайлэн Тэкеез но Миквор агайлэн Педочез. Соослэн сюръёссы йылсоесь но кузесь. Пиналъёс соин ик чупрес кечъёслэсь палэнэгес карисько. Кин тодэ, мар дауртозы та сюро пудоос.
Коляослэн Маня кечсы азбаре скалзылэсь азьло: вуэ. Со пичи быжзэ шонаса лыктэ. Шумпотэ лялы но Марпапайлы: кузёосыз сое нянен пумиталозы угось. Турын куаръёсын, векчи вайёсын кӧтсэ тыриз ке но, нянь котькыӵе сиёнлэсь солы ческыт потэ. Сое Коля яке Марпапай веръян понна гинэ сёто ке но, Маня вераны луонтэм шумпотэ. Гажало кузёос кечсэс. Маня но соосты яратэ, котькуд нуналэ ческыт йӧл нуллэ.
Парсь
Коля но Валентин кема ветлӥзы Сизьгурт гурезь бамалъёстӥ, пушмульы утчаса. Ӧз шедьтэ,‒ туэ та ческыт емыш чик удалтымтэ. Бертыны малпало вал ини, Валентинлэн йыраз ӟеч малпан лыктӥз:
‒ Пушмульы ӧм шедьтэ бере, ойдо тыпы мульы бичалом.
‒ Map каромы бен соин? ‒ ӧз вала Коля.
‒ Парсьёслы сётомы. Уд тодӥськы шат, макем соос ярато сое?
Котькуд тыпы улын тачак мульыос. Соос бадӟымесь, куд-огез пӧлы быдӟа, вылзы вольыт, из кадь чурыт. Шӧмзыя нош кузял. Кызьы меда таӵе курыт емышез парсьёс сиё?
Дораз бертыса, Коля соку ик гид пала вамыштӥз. Борька нимо парсьсы доры пыриз. Бадзым мугоро парсь нукыртыса Коля доры матэктӥз.
‒Тани мон тыныд кузьым ваи, Борька! ‒ Коля кудыысьтыз тыпы мульыоссэ пу тусе кисьтӥз.
Борька Колялэсь кузьымзэ син куспын сиыса быдтӥз. «Талы ӵемгес нуллоно та сиёнэз, макем ӝог сое лоскатӥз»,‒ малпаз Коля.
Курег
Марпапай вазь ӵукна ик курегъёсты сюдэ. Сиён соослы корам сьӧд потлэсь, пызьлэсь яке нянь дася. Курегъёс тусьты доры ури-бери вуо. Тужгес но ассэ шаплы возе чибор тылыё курег. Эшъёссэ со жалятэк кокча, сиён дорысь улляса, кӧтсэ тырыны дыртэ. Огпол Коля вазь ик султӥз не та куреглэсь сыӵе выремзэ адӟиз. Солы жаль noтӥзы мукетъёсыз курегъёс.
‒ Кыш! кыш! ‒ улля со эрказмем курегез.
‒ Эн йӧтылы сое, пие! ‒ курег пала дурбтӥз песянаез.
‒ Ма, учкы ай, кыӵе со кӧттырмостэм но возьыттэм! Ассэ гинэ тодэ! Кыш!‒ курегез курдатыса, киыныз шона пияш.
‒ Курегъёслэн сыӵе сямзы, Коля. Соос по кузёяськисьёсыз но, курдасьёсыз но вань. Выросъёссэс уд вошты ни. Кужмо курегъёс, мукетъёсыныз ӵошатыса, тросгэс пузало.
Атас
Мукетъёсызлэн атасъёссы горд яке чибор, нош Коляослэн юг-юг тӧдьы, бадӟым льӧль-горд ӟускиен, пельугыосыз кузесь, нап вирен пачылмемын кадь. Петязы кенер йылэ ке ӝутске, одно ик «ку-ка-ре-ку!» чортэ. Мукет юртъер котырысь атасъёс Коляослэн корка доразы но бакчаязы пырыны уг дӥсьто, малы ке шуоно, соос ӟеч тодо Коляослэн атассылэсь кужымзэ. Солэн нырыз корт кадь юн но лэчыт, пыдъёсыз венё, гадьыз кужмо, лӧб-лӧб. Атасъёс кышкаса учко Петя шоры, нош курегъёс сое гажало, одӥг но уг кӧберало.
Немыч
«Уф, уф, уф!» ‒ ветлэ неныч. Со нокннлэсь но уг кышка. Горд буёло арбериез яке горд дӥськутэн адямиез адӟе ке, чылкак шузиме кадь. Лекомем айы немыч быжзэ арган кӧрык кадь шепертэ, кышкатыса кулыртэ.
Куинь нунал ӵоже жаль-жаль зориз Ӟазегъёс но чӧжъёс шумпото таӵе куазьлы, соос пукись вуын пыласько, миськем чылкыт гуждорез кокчаса сиё. Курегъёс липет улын нырулыса сыло, шуныт но шундыё дырез возьмаса. Немычъёс сямен ик, соос но зоро куазез уг ярато. Нош кытчы ышиз-быриз немычъёслэн кышкасьтэм, кайгуэз валасьтэм сямзы? Секыт мылкыдын соос сопала-тапала лёгасько коргидэтӥ. Марпапай сюлмаське: «Таосыд висьыны медаз усе вал». Со уга умой тодэ немычъёслэсь котлы но кезьытлы чиданы быгатымтэзэс. Коляез бакчае нӥзилиосты бичаны ыстӥз. Немычъёс соосты шумпотыса сиё но висёнлы уг сётско.
Ӵӧж
Мумы чӧжез тютюпиосыныз ӵош Марпапай нырысьсэ тыметэ лэзиз. Йӧно кариськыса нуиз со нылпиоссэ яратоно интыяз. Чӧжпиос анайзы сьӧры одӥг чурен кыстӥськыса мынӥзы. Коля кышка: уз вые-а та пичи комокъёс? Соослэн бадӟым вуэз адӟемзы ӧвӧл на ук! Нош мумы ӵӧж ярдуре кырыж-конгыль лёгаськыса вуиз но жомбыляк! вуэ тэтчиз. Тыметысен кӧня ке пол, «кря, кря, кря!» шуыса, куаразэ сётӥз гинэ, ӵӧжпиос, чик кышкатэк, анайзы сьӧры вуэ тэтчазы. Пичи пыдъёсынызы полысаса, соку ик мумызы котыре вуизы.
‒ Песянай, ку чӧжпиосмы уяны дышиллям? ‒ паймыса юа Коля.
‒ Соос дышетскытэк но уяны быгато. Мугорзы капчи, гонзы вуын уг котмы, пыдъёссылэн чиньы висъёсазы паськыт кузы вань. Сыӵе пыдъёсын соос каньылэн уяло.
Ӟазегъёс
Выль гуждор вылын айы ӟазег эктэ: топи-топ, топи-топ!
‒ Песянай, учкы ай, ӟазегмы чылкак адями кадь эктэ! ‒ пайме Коля.
‒ Озьы со шумпотэмзэ возьматэ,‒ валэктэ Марпапай.
‒ Нош малы со озьы шумпотэ?
‒ Куазь шуныт, шундыё, сиён-юонзы тырмыт, котькуд мумы ӟазеглэн быдэн дас кык тютюосыз потӥзы. Учкы ай лыдӟыса. Тани марлы шумпотэ айы.
Кролик
Шуныт палъёсын кроликъёс ас понназы кырын уло шуыса иворез кылыса, Коля пельызлы ӧз оскы кадь.
‒ Соосты сьӧсь изьверъёс быдтозы ук!
‒ Соосты озьы гинэ нокин но кутыны уг быгаты,‒ валэктӥз Валентинлэн дядяез, Миквор агай,‒ малы ке шуоно, кроликъёс сюез мур гудо но гуосын уло. Со гуос туж мудронэсь, кырыжо-мерыжо копамын, куд-ог интыосын улыно-вылыно лэсьтэмын. Нокыӵе лулос но соослэсь радзэс уг вала, кроликъёслы гинэ со тодмо. Шуом, кыӵе ке сьӧсь изьвер кроликъёс доры матэктэ ке, кузь пельёс соку ик музъем пушкы, гуосазы, пегӟо. Шедьты на соку вакчи быжъёсты!
‒ Нош малы асьме палан кыр кроликъёс ӧвӧл? ‒ юатэк ӧз чида Коля.
‒ Соослы асьмелэн куазьмы кезьыт потэ.
Валентинъёслэн кроликъёссы вань. Соос клеткаосын уло. Колялы соос туж мусо пото, уката ик та кузь пелё лулосъёс веник куарез яке бакча сиёнэз йыръё ке.
Писэй
‒ Песянай! Валентин писэйзылэсь мыйыкъёссэ качыен вандылэм. Писэйлы вӧсь, дыр, ук?!
‒ Ма, со чылкак валантэм уж лэсьтэм! Taбере соослэн писэйзы шыраны уз быгаты ни, сиён зынэз но уз шӧды.
‒ Мыйыкенызы писэйёс зынэз шӧдо шат?
‒ Озьы шуо калыкын. Тон, пие, Валентин сямен эн йыртэма, ява.
‒ Ми соин Машкалэсь но мыйыкъёссэ ӵышкыны малпаськом вал. Табере ум йӧтылэ ни. Нош соос выльысь будо-а?
‒Уг, пие. Табере эшедлэн писэез пырак мыйыктэм улоз.
‒ Нош писэйлы вӧсь луэ-а, мыйыкъёссэ вандыку?
‒ Уг, дыр. Вӧсь ке луысал, писэй бӧрдьсал.
Муш
Огпол бускельзы, Оринка апай, Колялэн песянаезлы шуэ:
‒ Осто, Марпапай, кызьы тӥ вань уждэс лэсьтыны вуиськоды? Пудо-животты но трос, бакчаяды оломар но будэ, емышо садды но вань, муш но вордӥськоды! Мушез укыргес но секыт, дыр, утялтыны?
‒ Ма, кызьы крестьян семья муштэк улоз? Муш вордон, радзэ валаськод ке, сокем ик секыт уж ӧвӧл. Со понна сюлэм макем шумпотэ, мушъёс тодмаса котыртӥд лобало ке! Чечы кыскон дыръя, уката ик шумпотоно. Чечы ‒ со мушъёслэн гинэ тыршемзы ӧвӧл, тынад но сюлмаськемед.
Берлогес Коля юаз песянаезлэсь:
‒ Песянай, монэ асьмелэн мушъёсмы тодмало-а, уг-а?
‒ Ачид мыным верад ук, соос тонэ огпол но ӧз лекалэ на шуыса, нош Валентинэз кӧня пол ини вӧсь каризы? Озьыен, тонэ соос матысь каро. Дядяйдэ но, нэнэйдэ но соос тодмало.
‒ Нош Лусьтромес но Машкамес?
‒ Тодмало, луоз, соосты но. Нош мушъёс, кузёзэс сяна, нокинэ матазы уг лэзё.