БилингваБилингвизмъя удмурт центрАндрей Александрович Самсоновлэн литературной мадиськонъёсыз
Андрей Александрович Самсоновлэн литературной мадиськонъёсыз басьтэмын Самсонов А.А. Визьпог: Нылпиослы кылын шудонъёс, мадиськонъёс. ‒ Ижевск: Удмуртия, 1994. ‒ С. 8-15 книгаысь.
МАДИСЬКОНЪЁС
Туж потэ ке сиемез
Корка пушкысь жуг-жагез...
Ньылэ ымаз нырыныз ‒
Туж чаляк тыре кӧтыз! (Пылесос)
Сакыр кадь ик со тӧдьы...
Со вылтӥ гылӟе дӧдьы...
Нош тулыс бызе, дыртэ ‒
Вань шуръёсыз улӟытэ! (Лымы)
Сюан-бӧрысьлы дася,
Вож буртчин дӥсен дӥся...
Турлы пӧртэм сяськаен...
Туж чебер адске выль кен! (Тулыс)
Шуныт вуэн пылатэ,
Анай сюлэмын шунтэ
Пичизэ но покчизэ...
Будэтэ ваньзэ, ваньзэ! (Гужем)
Ю нянен но емышен
Кин ваньзэ узырмытэ?
Пазяське со зарниен,
Ӝож гурзэ ке но мытэ! (Сӥзьыл)
Ньыль сэрего тыбырыз,
Ньыль пыдыз,
Ӧвӧл йырыз.
Инмар сэрег вадесын,
Котькуд коркан пуктэмын…
Нуналлы куинь пол дораз
Одно ӧте котыраз...
Яратэ куно карны...
Соин капчи улыны...
Кин ке тодӥз чабей ӝук!...
Ӧд ке тоды ‒ улаз пук! (Ӝӧк)
Коргид сиг дурын тэтча,
Мае, шуоды, утча?
Курегез туж ӝог кутча,
Солэсь пузъёссэ кокча...
Кыӵе со тылобурдо?
Пиналъёс уг-а тодо?
Тыбырыз солэн куӵо...
Курегпуз лушкась……. (Коӵо)
Коркаез уте,
Кузёзэ вите...
Ӧс доры матэ
Со уз лэзь муртэ! (Пуны)
Адями ӧвӧл ке но ‒ вераське! (Попугай)
Йырыз буртчин чилясь вож…
Куараез солэн ‒ туж ӝож... (Айы ӵӧж)
Уг адӟо огзэс огзы ‒
Гурезь уго висказы...
Кыкназы ик огкадесь,
Котьку соос туж сакесь...
Пичиысен кыктоос,
Ӵошен ужало…
Гурезь ке но висказы,
Туж шулдыр ук улонзы:
Котьмае соос кыло ‒
Кузёзылы верало! (Пельёс)
Кӧтыз ‒ бадӟым колёса...
Ньыльпыд йылаз сылэ со...
Вите пыдын лёгамез
Пыд вискысьтыз педалез...
Педаль сое бергатэ,
Ужаны солы юрттэ.
Сюмориысь ыжгонэз
Потэ, лэся, кыскамез...
Вань калыклы шумпотон
Вае ӝог ужась…… (Черсон)
Уйёсы визьнод сузе,
Ӟеч мылкыд сюлмаз возе.
Котькытчы соин сузе,
Со сярысь малпан возе. (Уйвӧт)
Пуклёкъёслэсь мугорыз,
Векчи кортлэсь пинъёсыз.
Ваче пинь кока шатыр ‒
Со озьы лэсьтэ кеньыр...
Пичи ке но со вуко ‒
Нош нимыз солэн... (Кикӧ)
Вордӥськиз ни выль нунал,
Чик уг шӧд сое пинал...
Юн ӟыгыртэм пиналмес...
Султыны уг лэзь…. (Валес)
Гур пушкын маке пӧзе,
Вуӵыртэ,
Мыным вазе...
Учкисько ‒ гурын комок,
Курень чилясь сюй ….. (Гӧршок)
Чик тубаттэк толэзёзь
Сузё соос лыз инмозь...
Уг, уг сузё тыбырозь,
Эшшо но шуг йырберозь! (Синъёс)
Гурт пумын сылэ корка,
Со вӧзын чебер капка...
Котыр сыло солдатъёс,
Коркаез сак возьмасьёс.
Ваньзы одӥг ӝуждаесь,
Огкадь ӵошкыт йылсоесь...
Отын будэ улмо сад...
Тодӥд ке, оскалтод шат? (Кенер)
Бен вуиз, лэся, толмы,
Котькытын тӧдьы лымы.
Паймисько, нош возь вылын
Сьӧд сюй, ява, поттамын...
Вуи одӥг люк доры,
Учкисько сюй люк шоры.
Кельтэмын шораз ик пась,
Мед утчалоз, пе, шырась.
Кошкем пытьыез ӧвӧл,
Ӵоктаз шат сое уй тӧл?
Тол куазен но со кыштыр
Кӧлтэк ужа мудӥсь ….. (Мудӥсь шыр)
Маскара ик та улон, ‒
Пайме пересь Паримон...
Толон ез кыскиз Сельфон,
Коркам пыртӥз… (Телефон)
Жирафлэн кадь мугорыз,
Слонлэн быдӟа кужымез.
Со уг сиы писпу куар...
Вань калыклы лэсьтэ кар! (Корка ӝутон кранъёс)
Гурт пумысь тэлямы
Кылле на ай лымы.
Нош вуиз ни тулыс,
Вожектэ пужым лыс.
Ми кожам вал кӧс кыз,
Чик ӧй вал веньёсыз.
Туж чаляк вожектӥз,
Милемыз паймытӥз.
Небытэсь куаръёссэ
Тодӥсько вешамме.
Чырсалэс лыс шӧмзэ
Кии тодэ веръямзэ? (Куаро пужым)
Одӥг гинэ мугорыз,
Кык, ява, ӟазег нырыз.
Ӝог уя солань-талань,
Сӥньысъёс уллань-выллань.
Нош бӧрсяз кельтэ пужы,
Ма со сыӵе, кин выжы?
Солэн нимыз туж мусо ‒
Со уго луоз… (Сусо)
Ужпи кадь ик чырткем азбарын,
Бергаса ворттылэ ук батыр.
Жуг-жагез огинэ люкаса,
Со лэзе ни кыре бергатса.
Учкыса, ма луэ азбарын,
Лушкемен эскери корказьын.
Шат монэ исаса со юри
Лыз инмозь ик тэтчаз …(Тӧлпери)
Кезьыт куазен толалтэ
Муръё гыркын дыбыртэ.
Кион сямен со вузэ,
Корка озьы куриське.
Юасько мон: ‒ Кин вузэ?
Со уг вера ас нимзэ.
Кин азьло мыным юрттоз,
Солэсь нимзэ шыпыртоз! (Тӧл)
Куное лыктӥз Варли,
Сьӧраз ваем …
Шунды кадь чебер, питрес,
Погылян кадь котырес...
Куртчыку ымын пырдэ...
Map салам со? Кин тодэ? (Быскыли)
Урамын шодӥз Петыр ‒
Ческыт зын вӧлске котыр...
Чабей….. пыже анай...
Веръяломы, оло, ай! (Чабей нянь)
Тусын пельняньлы укша,
Шӧмыз ческыт тамаша.
Бадӟым гурын пыжемын,
Ӟазег вӧйын воямын.
Пушказ ‒ кенэмен сяртчы
Эше, кылдэ эн куртчы.
Яратэ сое Прокоп...
Пӧрамлэн нимыз … (Кокрок)
Бадӟым гурын гӧршокын
Сӥльын ӝук вал пуктэмын.
Ӝукмы вазе ни вуӵыр!
Гольык ки гуре уд пыр!
Маин сое басьтоно,
Кытысь-о ай утчано?
Вакчи гинэ мугорыз,
Туж кужмоесь сюръёсыз.
Вунэтод, пе, сое шат!
Нимыз нош солэн … (Ухват)
Пуньылэн вань апаез,
Ӧвӧл, дыр, тодӥсьтэмез...
Шыдэз, ӝукез ӝутыны
Одно кулэ ук …. (Дуры)
Азьвыл лэсьто вал пулэсь,
Табере чилясь кортлэсь.
Вань азвесьлэсь, зарнилэсь,
Нош мыным кельше пулэсь...
Со уг ӵушка ымдурез,
Жаля котьку азьпинез.
Сотэк у г лу улыны,
Уг лу кӧтэз тырыны...
Асьмеды со ӟеч сюдэ...
Кутӥд ке юн … (Пуньы)
Туж векчи чебер ныдыз,
Кортлэсь нош солэн йырыз.
Соин пыжо пӧсь табань,
Куддылэн адӟемды вань?
Пыж ай табань огминут...
Юрттоз ачиз … (Табапуд)
Бакчаез но со гудэ,
Лымыез но утялтэ.
Пӧрамез гурысь октэ,
Шып гинэ ваньзэ лэсьтэ!
Кыӵе-сыӵе со тӥрлык?
Ӧд ке тоды, дорам лык!
Верало тыныд лушкем,
Гурысь потӥз ке пыжкем...
Умой учкы Одока...
Солэн нимыз … (Лопатка)
Ог-огезлы кык такаос
Йыркуръясько визьтэм йыръёс...
Ваче пумит сюрзэс пукто ‒
Музъемез ик кадь зуркато,
Тылгизьыос сюрзы бордысь
Чилектыса пото ӵемысь.
Кудзы кужмо ‒ тодӥсь ӧвӧл,
Кыкназэс ик улляз сильтӧл. (Пилемъёс)
Оло нош быдэс толэзь
Ватскыса улӥз Толэзь.
Ӵӧж сямен, дыр, со лушкем
Пузъёсыз вылын пукем.
Зэмзэ ик, лэся, сикын
Пи поттэм лӥял гыркын...
Учкы аи, кӧня нимын
Толэзь уя пиосын! (Толэзь но кизилиос)