БилингваБилингвизмъя удмурт центр

Нылпи кырӟанъя "Камали" студия туэ сӥзьыл 7-тӥ сезонзэ усьтэ.

Пиналъёс арлы быдэ репертуарзэс вошто, выль кырзанъёс дышето. Кылем сезон студия понна туж пайдаё вал: Быдӟым Вормон нуналлы сӥзем кырӟанлы видеоклип дасязы, Ижкарын ортчем "Стань первым" гала-концертэз сиё-дано усьтыны оскизы, трос выль кырӟанъёс кылдытизы, "Open Air Эктоника 2018" фестивале но Элькун Гербер шулдыръяськонэ пыриськизы.

Кыккылолыкъя «Место семьи в становлении и развитии речи ребёнка (с опорой на удмуртский язык)» нимо XVII семинар Элькунысь дышетӥсьёслэн но нылпи садъёсысь ӧнерчиослэн куремзыя ортчытэмын вал. Семинарез радъясьёсты но куноосты котьку сямен пумитаз Ижкарысь эшъяськон юрт.

Ужрад улсын анай кылэз дышетон ужпумъёсъя дышетӥсьёсын но анай-атайёсын кусып тупатон сярысь юанъёс эскериськизы; семья куспын кылдылӥсь шуг-секытъёсты сэрттон амалъёсты шараязы.

26-тӥ куарусёнэ Ижкарысь эшъяськон юртын «Билингва. О практиках формирования двуязычия в современной городской среде» ӵектос быдэсъяськем улсын кыккылолыкъя «Место семьи в становлении и развитии речи ребёнка (с опорой на удмуртский язык)» нимо ХVII семинар радъяськоз. Ужрад ортчытӥське азьмурт грантъёсъя Фонд но Элькунысь йӧскалык политикая министерство юрттэм улсын.

Семинарын кык кылын вераськись пиналъёсын ужан амалъёсын тодматскон ортчоз. Семьяын билингвизм, кык кылын вераськыны ӟеч луонлыкъёс кылдытон сярысь кенешозы анай-атайёс.

Семинаре ӧтисько нылпи садъёсысь онерчиос, покчи классъёсты дышетисьёс, логопедъёс, ӟуч но удмурт пиналъёсын ужась психологъёс.

13-тӥ куарусёнэ Глазкарысь «Зелёный мир» лыдӟиськонниын «Вуюись. Радуга» ӵектос быдэсъяськем улсын удмуртлыклы сӥзем выль кружок ужаны кутскиз. Глазкарын усьтӥськиз нылпиос понна удмурт культуралы сӥзем кружок.

Ужрадлэн валтӥсь ужпумез – покчиосты удмурт калыклэн кылэныз, лулчеберетэныз, сям-йылолъёсыныз тодматон. Дышетскон ар ӵоже ортчозы вуюисьлэн буёлъёсызлы сӥзем 7 пумиськонъёс.

Пинал блогер! Тон понна ми ялӥськом выль конкурс - "Билингва-TV. Мынам школае"!

Гожтэ но ыстэ милемлы асьтэ школады сярысь видео: кинлэсь нимзэ нуллэ дышетсконниды? Со адямиез учкисен тодматоно. Нош сыӵе нимъёс ӧвӧл ке - вералэ школаяды дышетскем-будэм тодмо но дано адямиос сярысь (кылбурчиос, геройёс, гожъяськисьёс, дано артистъёс, космонавтъёс но мукет). Тырше видеоужады школадылэсь туссэ рос-прос возьматыны (юрттоз монтаж, асьтэос ке кадрын - кӧня ке сцена быръе), дано улосчидылэсь но туспуктэмзэ адӟытэ.

Ужъёсты кутӥськом udmbilingva@yandex.ru адресъя 5-тӥ коньывуонозь.