БилингваБилингвизмъя удмурт центр
Ӵуказе, 11 шуркынмонэ, Удмурт Элькунысь йӧскалык политикая министерствоын "Кылдысин: учим удмуртский" но "Удмурт-ӟуч-англи кылын вераськон" Андроидлы мобильной приложениосын тодматон ортчоз.
Приложениос ас коже удмурт кылэз дышетыны юрттозы.
Иворъёс
"Билингвотека. Билингвизм сярысь" ёзэтэ ватсамын Эллен Биалистоклэн "Кыккылолык: кылъёсты тодонлэн пайдалыкез" статьяез.
Психолог Эллен Биалисток та статьяын пыр-поч эскере кыкыллыклэсь когнитивной пайдалыксэ, чакла, кызьы та быгатонлык Альцгеймер висёнлэсь уте но мукет юанъёслы ответ сётэ.
Россиысь выжы калыкъёслэн кылъёссылы сӥзем олимпиадае удмурт шаерысьтымы пыриськиз 10 мурт. Студентъёс пӧлын вормисе потӥз Удмурт кылосбуръя, финноугроведениея но журналистикая институтысь 4-тӥ курсын дышетскись Марина Пахомова.
Олимпиада ортчиз Москваын 2-тӥ-4-тӥ шуркынмонэ, солэсь азьвыл котькуд улосвылын ортчиз быръён этап, Удмуртиын со пыр потӥз 10 адями. Россиысь олимпиадае вуизы 17 улосвылъёсысь но элькунъёсысь 138 студентъёс но школаын дышетскисьёс.
"Билингвотека. Кылъёсты дышетон сярысь" ёзэтэ ватсамын "Шара лыдӟонъёс" методика сярысь кык видеоадӟытонъёс, кудъёссэ лэсьтӥз семинар ужаку Владислав Степанов. Италиын улӥсь удмурт нылкышно Лариса Широбокова-Монако балингв (кык кылын вераськись) пиналъёсты ӟуч кыллы дышетэ, аслаз но пиналыз куинь кылын умой вераське. Туннэ нуналлы со билингвизмъя одӥгез устоез ӧнерчи луэ. Кыккылолыкъя семинарын со анай-атайёслы, нылпиослы возьматӥз кылэз волятонъя "Шара лыдӟонъёс" нимо методикаез.
"Удмуртия" информационной агентствоысь журналист Майя Бывальцева, Кыккылолыкъя семинаре вуылэмез бере, "Кӧня кыллы дышетоно покчи нылпиез: малпанъёс но дышетон амалъёс" статья гожтӥз. Статьяын лыдӟыны луоз семинарысь журналистэн висъям тунсыко шедьтосъёс но семьяын кыллы дышетон амалъёс сярысь.