БилингваБилингвизмъя удмурт центр

«Удмурт нылпилы — удмурт выжыкыл!» видеоконкурс ялӥз «Удмурт нылкышно кенеш» огазеяськон. Ужрад Анай кыллэн калыккуспо нуналэзлы сӥземын.

Ужъёсты 19-тӥ тулыспалозь огазеяськонлэн «ВКонтакте» мерлыко вотэсысь бамаз келяно.

Конкурсэ котькуд мылкыд карись пыриськыны быгатэ. Выжыкылэз мадёно пичи пиналлы шуыса, тунсыко, чебер удмурт кылын. Басьтыны луэ котькыӵе калыклэсь выжыкылзэ, но верано одно ик удмурт кылын. Со сяна, ас малпам выжыкылъёсты но мадьыны яра.

Удмурт кылъя курсъёс Удмуртиын 1-тӥ тулыспалэ ужаны кутскозы. Куинь толэзьем курсъёс бере дышетскем адямиос сертификатъёс басьтозы.

Курсъёс радъясько Удмурт Элькунысь йӧскалык политикая министерстволэн кичӧлтэмезъя анай кылэз дышетӥсьёслэн "Выжы" ассоциациен.

2016-тӥ арлэн кыкетӥ палараз элькунамы удмурт кылэз дышетонъя 17 курсъёс усьтэмын вал: 8-эз соос пӧлысь Ижкарын радъяськизы, 9-эз — Удмуртиысь ёрос центръёсын.

Ижкарын 26 толшоре удмурт кылэз дышетыны мылкыд карисьёсын Калыкъёслэн Эшъяськон юртазы организационной собрание ортчытозы. Кутсконэз 17 часэ.

Удмурт кылэн эшъяськись 8–11 классъёсын дышетскись пиналъёс 19-тӥ толшоре «Вожо балын» шулдыръяськизы. Удмуртиысь Калыкъёслэн эшъяськон юртазы оглом 80 дышетскисьёс люкаськылӥзы.

Пиналъёс понна радъям ужрад Выль арлы сӥземын вал. Отчы Ижкарысь школаосын удмурт кылэз дышетӥсь азьветлӥсь пиналъёсты, озьы ик Москваын олимпиадаын но Казаньын конференциын Удмуртилэсь данзэ утемъёсты ӧтизы.

Егитъёслы шутэтскыны но шулдыръяськыны туж тунсыко программа дасямын вал. Пиналъёс полонез но падеграс эктонъёсын тодматскизы, удмуртъёслэн сямъёссыя, улэм-вылэмзыя визьсынан шудонэ пыриськизы, «Капка», «Небыльток» но мукет шудонъёсын шудӥзы, туала крезьгуръёсъя позыръяськизы.

Глазовысь педагогикая институтын вуоно дышетскон арысен удмурт кылъя эшшо одӥг группа кылдоз Али отын удмурт кылъя но англи кылъя дышетӥсьёсты дасяло. Нош 1-тӥ куарусёнысен нылпи садъёсы удмурт воспитатель ӧнеръя вылӥ тодон-валан сётыны кутскозы. Отчы 10 муртэ кутозы. Дышетон бюджет амалъя нуиськоз.

1898 арын 14 толшоре Кузьма Павлович Чайников - Кузебай Герд - вордӥськиз. Со удмурт совето нылпи литературалэн азьветлӥсез луэ.

ХХ даурлэн 20-тӥ аръёсаз Кузебай Герд пыр-поч чакласькыны кутскиз нылпи литературалэн азинсконэз сярысь. Со нырысетӥез, кин та юанлы кӧня ке статьязэ сӥзиз. Со сяна со ачиз нылпиослы чеберлыко произведениосты гожъян борды мыло-кыдо басьтӥськиз. Вакчи дыр куспын со 140 котыр кылбуръёс но веросъёс гожтӥз.

Тросэз произведениосыз «Шуныт зор» (1924), «Выль сюрес» (1929) учебник-хрестоматиосын но «Сяськаяськись музъем» (1927) кылбур бичетын печатламын вал.