Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

анай клуб
Удмуртлыкез возись анай-атайёслэн клубзы нош ик пумиськон ортчытӥз

Удмуртлыкез возись анай-атайёс нылпиоссылы праздник радъязы. Туннэ "Мугур" студиын удмурт кылын вераськись анайёс но соослэн нылпиоссы нош ик пумиськон ортчытӥзы. Котьку сямен ик нылпиос понна удмурт кылын мастер-класс радъямын вал. Туннэ пичиос горд сюйлэсь тылобурдоосты но лудкечъёсты лэсьтӥзы. Озьы ик пумиськонын нылпиос чиньы мунёоосын шудӥзы, кылбур дышетӥзы.

шундыкар
"Шундыкар-2017" возьма

20-29-тӥ гудырикошконэ «Ёлочка» лагерьын "Шундыкар-2017" смена ортчоз.

Удмурт егитъёслэн "Шунды" огазеяськозы 5-11-тӥ классын шор ёзо школаосысь но 18 аресозь шор дышетсконниосысь удмурт нылпиосты сменае мынон понна вожвылъяськонэ пыриськыны ӧте.

Вожвылъяськонэ пыриськон понна кулэ:

  1. Пыриськись сярысь гожтэт ыстыны – нимзэ, фамилизэ, атай нимзэ, вордӥськем арзэ, улон интызэ, кыӵе классэз быдэстэмзэ, пӧртэм огазеяськонъёслэн ужазы пыриськемзэ пусъёно, «Шундыкар» лагере вуылэмзэ (кыӵе арын но кыӵе ӧръя пусъёно), одно ик герӟаськон амалъёсты (телефон номерез аслэсьтыз но анай-атайлэсь, электрон почтаез) гожтоно.

  2. Быръем ӧръя уж быдэстыны.

Ужъёс 16-тӥ пӧсьтолэзёзь кутӥсько. Йылпумъянъёс элькун газетъёсын но «Шунды»-лэн сайтаз http://udmshundy.ru 27-тӥ пӧсьтолэзь бере печатламын луозы.

выжы
29-тӥ куартолэзе "Выжы-выжы-выжыкыл" фестивальлы йылпумъянъёс лэсьтозы

«Удмурт нылкышно кенеш» огазеяськонлэн кичӧлтэмезъя элькунысь каръёсын но ёрос центръёсын «Выжы-выжы-выжыкыл» нылпи фестиваль ортче.

Фестивале пырисько удмурт кылэз, йылолъёсты дышетӥсь нылпи садъёс. Отчы ветлӥсь пиналъёс Удмуртиын улӥсь калыкъёслэн выжыкылъёссыя удмурт кылын возьматонъёс дасяло. Ужрад Удмуртиын улӥсь калыкъёслэсь йылолъёссэс тодон но элькунысь нылпи садъёсы удмурт кылэз пыртонын выль амалъёсты вӧлмытон вылысь радъяське.

29-тӥ куартолэзе "Выжы-выжы-выжыкыл" фестивальын возьматэмын луозы устоосыз пӧлысь самой устоосыз выжыкылъёс.

фестиваль
«Лудорвайын» финн-угор мультфильмъёсты возьматӥзы

Музейёслэн дунневыл нуналзылы сӥзем ужрадъёс улсын «Лудорвай» музейын ортчиз финн-угор мультипликацилы сӥзем нырысетӥез фестиваль-конкурс.

Эстон, хант, саам, удмурт, пор, карел, коми, мордва калыкъёслэн выжыкылъёссыя, мадёсъёссыя но веросъёссыя 38 мультфильмъёс возьматэмын вал.

Ужрадлэн валтӥсь мугез — финн-угор дуннелэсь дауръёс пыр утем узырлыксэ туала амалъёс пыр усьтон.

Вожвылъяськонэ ыстэм ужъёсты жюри дунъяз вить номинациосъя: нылпиослы сӥзем мультфильм, авторский, студийный, прикладной анимаци но калыклэн кылызъя лэсьтэм мультфильм.

библиотекаын
Ижкарын нош ик ортчиз Удмуртлыкез возись анай-атайёслэн клубзылэн пумиськонэз

18 куартолэзе Пиналъёслы но егитъёслы элькун лыдӟетъюртысь шаертодонъя но йӧскалык литературая ёзэтаз ортчиз Удмуртлыкез возись анай-атайёслэн клубзылэн пумиськонэз. Таяз учыре ужрадэз тодмо суредась но удмурт кылын вераськись кык нылпиослэн анайзы Екатерина Мензарипова радъяз. Анайёс пиналъёсын ӵош тодазы вайизы но, дышетӥзы но мылкыд нимъёсты, дышетскизы мылкыдъёсты суред пыр кагаз вылын возьматыны. Пумиськонын суредаськем сяна нылпиос шудӥзы но, кылбуръёсты но лыдӟизы, шулдыръяськизы но.

Вуоно пумиськонмы куазез утён темалы сӥземын луоз. Иворъёсты возьмалэ!

Вань анайёслэсь но пиналъёслэсь мылкыдзэс лыдэ басьтыса Катя Мензариповалы туж усто мастер-класс ортчытэмаз понна тау шуиськомы! Нимаз тау шуэммы потэ Маргарита Валериановна Танаевалы, Пиналъёслы но егитъёслы элькун лыдӟетъюртысь библиотекарьлы!