Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

мугурын анай клуб
"Мугурын" Анай клублэн куинетӥ пумиськонэз радъямын вал

2 оштолэзе "Мугур" студиын Анай клублэн куинетӥ пумиськонэз ортчиз.

Таяз учыре пумиськонэз Вера Степанова, егит анай, кудӥз кема дыр ӵоже ини валтэ та студиен, радъяз.

Анайёс нылпиосынызы ӵош горд сюен ужазы, Быдӟымналлы курегпуз возён лэсьтӥзы. Собере анайёслэн ог-огенызы кенешыны-вераськыны дырзы вал, нош нылпиос кӧня ке бызьылӥзы но шудӥзы. Пумиськонлэн пумаз котькуд нылпилы Вера аслэсьтыз "Удмурт сюй мунё" ужан тетрадьзэ кузьмаз. Анайёс та пумиськонэз радъясьёслы туж ӟеч кылъёс вераса кошкизы.

мугур
"Пельысь пеле, ымысь ыме" клуб нош ик ӧтчаське

Анай клубмы нош ик усьтэ ӧсъессэ но пумиськонэ ӧте! Таяз пумиськон ортчоз Мугур нимо студиын (Пушкинская урам, 229 юрт). Та пумиськонмес, кызьы валады ини, радъя Вера Степанова, со кема дыр ӵоже ини валтэ та студиен.

Пумиськонлэн ужан радыз:

Горд сюен ужан (мастер-класс), сӥзём та ужъесмес вуись бадӟым праздниклы - Пасхалы).

Собере анайёс шедьтозы дыр вераськыны-супыльтыны, пиналъёс шудыны, пичияк сиськыны. Котькуд семьялы (пиналлы) студилэсь сётиськоз "Удмурт сюй мунё" ужан тетрадь, кудӥзъя асьтэос но быгатоды гуртын занятиос ортчытыны. Вера быгатоз сётыны методической валэктонъёс.

Пумиськон ортчоз арня нуналэ 2 оштолэзе 11.00.

Таяз дыре занятие дунын луоз: 200 манет - анай но пинал; 300 манет - анай но 2 пинал.

Ӵектиськом сьӧрады кутыны стаканчик печенняен компот юыны. Дӥсяськыны туж тузӥ кулэ ӧвӧл, луоз кутыны сьӧрады воштон пыдкутчан, кулэ ке – азькышет но.

Ӟичы но атас
Быги гуртысь нылпиос мультфильм кылдытӥллям

Шаркан ёросысь Быги школаысь 2-тӥ классын дышетскисьёс пластилинлэсь "Ӟичыен атас" мультфильм кылдытӥллям. Мультфильм кылдытэмын калык выжыкылъя. Пластилинлэсь геройёсты нылпиос ас киынызы лэсьтӥллям. Озьы ик соосты улэп но куараё кариллям асьсэос ик. Нылпиослэсь быгатонлыксэс "Пайдаё чӧлскетъёс" ёзэтын дунъяны быгатоды (татын мультфильмлы ссылка сётэмын).

телеграм
Гожтэтъёсын воштӥськон Telegram вотэслы удмурт шӧмо стикеръёс поттӥз иворъёсъя «Удмуртия» агентство

Иворъёсъя «Удмуртия» агентство гожтэтъёсын воштӥськон Telegram вотэслы удмурт шӧмо стикеръёс лэсьтӥз.

Стикеръёслэн геройёссы — удмурт фольклорысь Лӧпшо Педунь но Вукузё, озьы ик элькунэнымы герӟаськем макеос — италмас сяська, перепеч, пельнянь, мотоцикл, автомат, крокодил, кизили но мукетъёсыз. Мылкыдэз возьматӥсь удмурт шӧмо суредъёсты ссылкая потыса кыскыны луэ.

Смайлъёсты поттон иворъёсъя агентстволэн удмурт бамез ужаны кутскем дырысен ар тырмонлы сӥземын. Со ӵапак 1-тӥ южтолэзе ужзэ мытӥз вал.

ожо-вожо
«Удмурт дунне» газет «Ожо-вожо» конкурс ялэ

Экологилэн арезлы сӥзьыса «Удмурт дунне» газет 12-16 аресъем нылпиослы «Ожо-вожо» конкурс ялэ.

Пиналъёс асьсэ быгатэмзэс кык номинацияя эскерыны быгатозы.

Инкуазез утёнлы сӥзем тужгес ӟеч кылбур яке верос гожтоно. Одӥг адями тужгес троссэ куинь ужзэ келяны быгатоз.

Инкуазез утёнлы сӥзем тужгес ӟеч проект (акция). Проектэз (акциез) улонэ пыӵатоно но та сярысь вакчияк мадёно. Акцие пыриськыны быгатоз быдэс класс но — 10-15 адями. Но группалэн быдӟалаез 5-лэсь трос ке, конкурсэ пыриськем сярысь сертификат быдэс класслы одӥг гинэ сётӥське, 5-лэсь ӧжыт ке — котькудӥзлы.

Конкурслэн положениеныз тодматскыны луоз «Удмурт Дунне» газетлэн сайтаз: www.udmdunne.ru.

Ужъёсты келяно 20-тӥ маёзь «Удмурт дунне» газетлэн редакцияз электрон почта пыр: udmdunne@yandex.ru яке гожтэтэн таӵе адресъя: Ижевск, К. Маркс ульча, 274 номеро юрт, «Удмурт дунне» газетлэн редакциез.

Вормисьёсты пӧртэм кузьымъёс возьмало. Валтӥсез — «Шундыкар» лагере путёвка.

Йылпумъянъёс лэсьтэмын луозы 1-тӥ июне — Нылпиосты утён нуналэ.