БилингваБилингвизмъя удмурт центр

"Шундысиос" нылпи движение "Мон яратӥсько шаерме" фотокросс ялэ. Кыӵе темаосъя лэсьтоно луоз фотоосты? Сое тодыны луоз 13 коньывуонэ 13.00 часэ "Шундысиослэн" ВК вотэсбамысьтыз (https://vk.com/shyndysios). Фотокроссэ пыриськон понна заявкадэс келяно 12 коньывуонозь Наталья Казаковалы.

Кык кылэз тодӥсь нылпиослы "НУНЫКАЙ" центр аслэсьтыз ужзэ азинтэ. Котькуд кӧснуналэ нылпиосты возьмало "СЁМА" центрын, кудӥз интыяськемын Карла Маркса ульча, 395 номеро корка адресъя.

Нылпиос арлыдзыя кык группалы люкемын: пичи нылпиос (2 - 4 аресъемъёсыз) центрын 11 часысен 12 часозь дышетско, нош бадӟымъёсыз (5 - 9 аресъемъёсыз) - 12 часысен 13 часозь 45 минутозь. Нылпиос понна радъямын вераськон кылэз волятонъя, крезьгуръя, киужен выронъя, сӥльвирез кыдатонъя урокъёс. Занятиос удмурт кылын нуисько.

Занятиос ортчылозы котькуд кӧснуналэ толсур толэзьлэн пумозяз.

13–17 коньывуонэ «Дзержинец» шутэтсконниын элькунысь егитъёслэн йӧскалык лулчеберетъя огазеяськонъёссылэн «Вместе» ассоциацизы 14-17 аресъем пиналъёс понна йӧскалыккуспо смена ортчытоз.

Туэ со Егитъёслэн но студентъёслэн дунневыл фестивальзылэн улосвыл программаезлэн люкетэз луоз.

Калыкъёслэн Эшъяськон юртазы 30 куарусёнэ нош ик кыккылолыкъя семинар ортчиз. Семинарлэн ужаз ог 50 адями пыриськиз.

Нырысь ик нылпиос удмурт кылын сценкаын, инкуазь явлениос сярысь интерактивной выжыкылын шудӥзы. Выжыкыллэсь сюжетсэ дышетӥсь лыдӟиз, нош геройёслэсь кылъёссэс нылпиос асьсэос малпазы. Учкисьёс пӧлын нылпиос но, анай-атайёс но вал.

Семинарлэн кыкетӥ люкетаз анай-атайёс но нылпиос нимаз ужазы. Анай-атайёслэн юанъёссылы ответ но комментариос сётӥзы кыккылолыкъя ӧнерчи, педагогика тодосъёсъя доктор И.Б. Ворожцова но нылпи психолог О.И. Смирнова.

Нылпиос понна тунсыко шудон радъямын вал. 1,5 аресысен 4 аресозь нылпиослы но 5 ареслэсь бадӟымгес нылпиослы заданиос нимаз чакламын вал. Котькуд нылпилы паспорт сётэмын вал, ужъёсты быдэстэмез понна отчы печать пуктӥзы. Шудон пумын вань шудӥсьёслы ческыт кузьым сётэмын вал.

Кыккылолыкъя "Билингва" удмурт центр 30 куарусёнэ нош ик семинарзэ радъя.

Семинармы азьло кадь ик Калыкъёслэн Эшъяськон юртазы (Ижкар, Орджоникидзе урам, 33 а) радъямын луоз. Кутсконэз 11 часэ.

Анай-атайёсын озьы ик пӧртэм ӧнерчиос ужалозы (кыккылолыкъя ӧнерчи, нылпи психолог), нош нылпиос понна тунсыко шудон радъямын луоз. Семинарлэн кутсконаз "Шара лыдӟонъёс" радъямын луозы. Таня апаен ӵош выжыкыл лыдӟом.

Семинаре ӧтиськомы удмурт кылын вераськись анай-атайёсты нылпиосынызы ӵош (нылпи садэ яке 1–2-тӥ классэ ветлӥсьёссэ).