Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

Билингва а13
2 инвожое кыккылолыкъя семинар но нылпиослы сӥзем праздник радъямын луозы

2-тӥ июне Ижысь Эшъяськон юртын радъяськоз нылпиосты 2 кылын вераськытонъя семинар.

Таиз пумиськон туэ понна 4-тӥез луоз ни. Сое сӥзёзы нылпиосты шудон пыр удмурт кылын вераськытонлы. Анай-атайёслы со пумысен визь-нод сётозы педагогика наукаосъя доктор Ирина Ворожцова, психолог Ольга Смирнова, логопед Татьяна Кудрявцева.

Мумы-бубыосын кенешон вискын нылпиосын ужалозы «Нуныкай» центрысь дышетӥсьёс.

Семинар бере ваньзэсты ӧтё Нылпиосты утён нуналлы сӥзем шулдыръяськонэ. Со ӝыны ар куспын «Билингва» проектлэн ужамезлы йылпумъян выллем луоз. Отын «Нуныкай» центрлэн театральной студияз ветлӥсь нылпиос асьсэлэсь быгатонлыксэс возьматозы. Соос «Сяртчы» выжыкылэз выль сямен пуктозы. Со сяна, пиналъёс мукет ужрадъёсы пыриськозы на.

Удмурт празднике ӧтемын «Вить дуно кылъёс» суредъёсъя но «Билингва — ТВ» мастер-классъя конкурсъёсын вормемъёс. Та вожвылъяськонъёс радъямын вал «Билингва» проектэз быдэсъян улсын.

усьтӥськись пучыос
Алнаш ёросысь пиналъёслэн «Усьтӥськись пучыос» книгазы потӥз

Алнаш ёросысь «Ошмес син» литогазеяськонэ ветлӥсь пиналъёслэн «Усьтӥськись пучыос» книгазы потӥз. Отчы пыризы 26 гожъяськисьёслэн кылбуръёссы, веросъёссы, выжыкылъёссы.

«Усьтӥськись пучыос» бичетэз лисъяса, пумитано пӧртэм нимъёсты: Мария Васильева, Полина Куликова, Анна Шарыпова, Ольга Камашева, Анна Бурдина… Тросэз таос пӧлысь али студентъёс ни, куд-огез векчи книгаоссэ но поттӥз ни. Нош литературае сюрессэс соос мытӥзы «Ошмес син» литогазеяськонын. Солэсь ужзэ 5 арзэ ни радъя Ашальчи Окилэн музей-юртысьтыз Мария Петрова.

Бичетэз поттыны юрттӥзы Кун Кенешысь депутат, «Удмурт Кенеш» огазеяськонлэн тӧроез Татьяна Ишматова но кылбурчи Лидия Нянькина, со редактор чотын вал.

— Пинал авторъёс пӧртэм темаос борды басьтӥсько. Бадӟымгес классын дышетскисьёс улон шоры философлэн синмыныз учкыны тыршо ини, покчиосызгес чуръёссэс анайзылы, песянайзылы, вын-сузэръёссылы, ньыль пыдо эшъёссылы, спортлы, инкуазьлэн пӧртэм вакытъёсызлы сӥзё. Котькудӥз пуш дуннезэ ачиз сямен усьтыны тырше, — книга пумысен гожтэ Лидия Нянькина.

Йӧно семья
Ижкарын "Йӧно удмурт семья" ужрад ортчиз.

Ижкарын "Йӧно удмурт семья" ужрад ортчиз. Пумиськонын сэрттӥзы-пертчизы туала семьяос азьын сылӥсь ужпумъёсты, удмуртлыкез утён но нылпиосты адямилыко будэтон сярысь юанъёсты. Ужрад улсын сӥлы каризы тужгес адӟем карымон куинь семьяосты. Таӵе пумиськон нырысьсэ ортчиз, радъяз сое удмурт тодосчиослэн огазеяськонзы.

Удмурт семьяос пӧлын данъязы Бикузинъёслэсь но Ильинъёслэсь семьяоссэс. Вераны кулэ, та семьяос мыло-кыдо пирисько "Билингва" семинаръхёсы, "Нуныкай" центрлэн занятиосазы нылпиоссэс нулло, "Анай клуб" огазеяськонэз кылдытӥсьёс луо.

Шундыберган
Туннэ «Шундыберган» нылпи фольклор фестивальлэн ёроскуспо люкетэз ортчоз

Туннэ Алнаш ёросысь Кучыран гуртысь калыкъёслэн лулчеберетсыя Т.К. Борисов нимо «Усадьба Трокая» огъетын «Шундыберган» нылпи фольклор фестивальлэн ёроскуспо люкетэз ортчоз.

Валтӥсь ужпумез – калык сямъёсты вӧлмытон, улосчиослы сое вуттон.

Фестивале пыриськозы школаосысь, лулчеберетъя юртъёсысь, Можга, Вавож но Алнаш ёросъёсысь искусствоосъя дышетсконниосысь фольклоръя нылпи коллективъёс.

Фестиваль в Уве
Уваын удмурт лулчеберетлы сӥзем "Крезьгуро шыкысэ" нимо нылпи фестиваль ортчиз

13-тӥ куартолэзе Уваысь "Юность" культура юртын удмурт лулчеберетлы сӥзем "Крезьгуро шыкысэ" нимо нылпи фестиваль ортчиз.

Отчы пыриськизы ёросысь 5 аресысен 15 аресозь кырӟась но эктӥсь нылпиос.

Соос кӧня ке оръёсъя быгатонлыкъёссэс возьматӥзы: удмурт кырӟан быдэстӥзы, кылбур лыдӟизы, крезьгуро инструментэн шудыны, калык эктон быдэстыны, киуж лэсьтыны быгатэмзэс возьматӥзы.

Конкурслэн валтӥсь ужпумез – нылпиос но быдэ вуымтэос пӧлын удмурт калык лулчеберетэз вӧлмытон.

Фестивалез Уваысь лулчеберетъя но егитъёсын ужанъя ёзэт «Удмурт кенеш» огазеяськонлэн ёзэтэныз ӵош радъяз.