БилингваБилингвизмъя удмурт центр

29 пӧсьтолэзе "Шундыкар" лагере мынон понна вожвылъяькон йылпумъяськиз. Со 22-тӥ — 31-тӥ гудырикошконэ «Ёлочка» лагерьын радъямын луоз. Татын 5-тӥ — 11-тӥ классъёын шор ёзо школаосысь удмурт нылпиосты но шор дышетсконниосысь 18 аресозь удмурт егитъёсты возьмало.

Лагерез Удмурт егитъёслэн "Шунды" мерлыко огазеяськонзы радъя.

18 пӧсьтолэзе Росси Федерацилэн общественной палатаяз Калыкъёслэн кусыпъёссыя удысысь устоосыз практикаосъя огъяросси конкурсын вормисьёс дипломъёсын пусъемын вал. Улосъёсысь 120 – лэсь ятыр ӵектосъёс вуэмын вал, бырйизы 11 устооссэ. Соос пӧлын Удмуртиысь но "Удмурт кенеш" огазеяськонлэн "Билингва. О практиках формирования двуязычия в современной городской среде" ӵектосэз пусъемын вал.

Ӵектослэн ужаменыз тодматскон ортчиз 19 пӧсьтолэзе Москвалэн кивалтэтзлэн «Олимп» нимо залаз Россиысь калыкъёслэн Ассамблеязы кылдэм дырысен 20 ар тырмонлы сӥзем пумиськон улсын.

17-тӥ июле "Грифон" арт-центрын ортчиз пиналъёслы крезьгуро ӝыт. Милям но ӧнерчиосмы ӧз чидалэ пыриськытэк, уго туж мӧзмиськом пичиосмылэсь. Таняапай огаз площадкаын нылпиосын пӧртэм крезьгуро инструментъёсын шудӥз-эктӥз!

17 пӧсьтолэзе 18 часэ 30 минутэ Ижкарысь «Грифон» арт-центрын «Шудон-корка» усьтӥськоз. Ужрад ортчоз «Кубыз» фестиваль улсын.

Отчы возьмало нылпиосты. Соосты эктытоз кубызчи Миклош Дэметэр, нош Анастасия Дэметэр-Петрова киужъёсын мастер-классъёс возьматоз. Елена Каракулова крезен шулдыртоз. Ужрадэ "Билингва. О практиках формирования двуязычия в современной городской среде" проектысьтымы ӧнерчиос но пыриськозы. Кылсярысь, Татьяна Бакаева шудонъёсты дышетоз.

Озьы ик отын ужалоз Дэметэр усточиослэн киужъёсын адӟытонзы.

«Удмурт Кенеш» огазеяськонлэн «Билингва. О практиках формирования двуязычия в современной городской среде» ӵектосэз Йӧскалык кусыпъёс удысын устоосыз практикаосъя огъяросси конкурсын вормиз.

Конкурсэ кутӥзы Азьмуртлэн фондысьтыз грант утэм ӵектосъёсты, кудъёссэ Россиысь мукет улосвылъёсын но капчиен азинтыны луоз.

Вожвылъяськонэ пыриськон понна куриськонын проект бордын тыршисьёс «Билингвалэсь» пуштроссэ валэктӥзы, ӵектос улсын быдэстэм ужъемышъёсты возьматӥзы, туспуктэмъёсты но видео, мерлыко вотэсбамъёсы но сайтъёсы чӧлсконъёсты интыязы. Озьы дунъясьёс ӵектосэз котырак эскерыны но адӟыны быгатӥзы, зэмзэ-а со тунсыко но пайдаё, луоз-а та проектэз мукет улосвылъёсын азинтыны.

19-тӥ пӧсьтолэзе Йӧскалык кусыпъёс удысын устоосыз практикаосъя огъяросси конкурсын вормисьёс ӵектосъёсынызы Москваын Россиысь калыкъёслэн конгрессазы люкаськемъёсты тодматозы.