Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

14 толшоре Кузебай Гердлэн вордӥськем нуналэз

герд 1898 арын 14 толшоре Кузьма Павлович Чайников - Кузебай Герд - вордӥськиз. Со удмурт совето нылпи литературалэн азьветлӥсез луэ.

ХХ даурлэн 20-тӥ аръёсаз Кузебай Герд пыр-поч чакласькыны кутскиз нылпи литературалэн азинсконэз сярысь. Со нырысетӥез, кин та юанлы кӧня ке статьязэ сӥзиз. Со сяна со ачиз нылпиослы чеберлыко произведениосты гожъян борды мыло-кыдо басьтӥськиз. Вакчи дыр куспын со 140 котыр кылбуръёс но веросъёс гожтӥз.

Тросэз произведениосыз «Шуныт зор» (1924), «Выль сюрес» (1929) учебник-хрестоматиосын но «Сяськаяськись музъем» (1927) кылбур бичетын печатламын вал.

Дэмласькомы Кузебай Гердлэсь кӧня ке кылбурзэ лыдӟыны.

Пудочи

Вазь ӵукна

Пичи Илля

Пудозэ

Лудэ улля.


Ту-ту-ту!

То-то-то!

Пудоме

Тэле потто.


Кунянъёс

Ворттыло,

Ыжпиос

Тэтчало.


Искалъёс

Бӧксыло

Ульчае

Потыло.


Тилинь-тинь!

Тилинь-тинь!

Гуртэтӥ

Кылӥське.


Иллялэн

Кырӟамез

Гурт сьӧртӥ

Шуккиське.


Ӟазегъёс

Дӥго!

Дӥго!

Юг-юг мугорзы,

Ӵуж-ӵуж нырзы,

Тапи-тап пыдзы...

Огзы

бӧрсьы

огзы

урам

кузя

кошко...

Мар со? Гозы?

Ӧвӧл!... Ӟазегъёс

Шуре васько,

Ваче верасько:

Га-га-га! Го-го-го!

Ӵош вамыштэ, эшъёс!..

Тапи-тап!

Тапи-тап!

Тап!

Тап!

Тап!