Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

17-тӥ тулыспалэ Эшъяськон юртын кыккылолыкъя «Билингва» удмурт центр но «Удмурт кенеш» огазеяськон билингвизмъя семинар ортчиз.

17 семинар

Кык кылолыкъя семинар ортчиз Ижкарысь Эшъяськон юртын. «Билингва: луонлыкъёсты огазеяськом» - таӵе ним улсын ортчиз семинар Эшъяськон юртын 17-тӥ тулыспалэ. Ужрадэ пыриськисьёс анай кылэз дышетонъя пӧртэм амалъёсты но луонлыкъёсты эскеризы. Анай-атайёс сяна семинарлэн ужаз пыриськизы #Удмуртия» издательствоысь, #МынамУдмуртие телерадиокомпаниысь ӧнерчиос, йӧскалык огазеяськонъёслэн ёзчиоссы но «Билингва» удмурт центрысь визьнодасьёс. «Удмуртия» издательстволэн кивалтӥсез Юрий Кузнецов удмурт нылпиос понна дасям яркыт книгаосын тодматӥз, семьяын лыдӟыны чаклам ужъёсты дэмлаз. «Удмурт кылэз дышетыны юрттон вылысь поттэмын ӝӧквыл шудонъёс, дуннеысь калыкъёслэн удмурт кылэ берыктэм выжыкылъёсынызы аудиокнигаос,» - пусйиз Юрий Васильевич. Пумиськонэ вуэм котькуд анай-атай кузьым басьтӥз – удмурт алфавит. Удмурт кылэз азинтыны, солэсь данзэ ӝутыны юрттэ удмурт нылкышноослэн Элькун кенешсы. Со #ПичиЧеберайёсноБатыръёс но #Выжывыжывыжыкыл нылпи фестивальёс, кылэз дышетонлы сӥзем #ШудонКорка площадкаос, анай-атайёс но пиналъёс понна интернет пыр ортчылӥсь пӧртэм ужрадъёс. Ӵектосъёсын тодматыку, #УдмуртНылкышноКенеш» огазеяськонлэн азьветлӥсез Надежда Степанова пусйиз, кылэз дышетонъя валтӥсез ресурс – со анайёслэн мылкыдъёссы. «Анай-атайёс пиналъёсты кык кылын будэтонъя тодон-валанъёссэс мукетъёсызлы сётыны кулэ. Туж умой, туннэ сыӵе луонлык кылдытэмын шуыса», - пусйиз Надежда Андреевна. Азербайджан калыклэн #Достлуг мерлыко огазеяськонэзлэн ёзчиез Шахла Мамудова семинаре ӧтемзы понна тау карон кылъёс вераз но ӵектӥз нылпиос понна йӧскалыккуспо шулдыръяськон радъяны. «Милям нылпиосмы туж мыло-кыдо пырисько азербайджан кылын ортчись ужрадъёсы», - пусйиз нылкышно. «Билингва» удмурт центрлэн кивалтӥсез Татьяна Волкова та малпанэз быдэстонъя луонлыкез шараяз – матысь дыре кылъёсъя нылпи фестиваль ортчоз. Анай кылэз дышетон ужын бадӟым инты басьто теле- но радиопрограммаос. Туннэ тросэз программаос но передачаос «Мынам Удмуртие» телерадиокомпаниын лэсьтӥсько – вераз «Шудон корка» программалэн авторез но нуисез Ольга Фархутдинова. Та нуналъёсы Кузёбай Герд нимо гимназилэн юртаз #Нуныкай центрлэн театръя выль кружокез ужаны кутскиз. Солэн огез валтӥсь ужпумез – телепрограмма нуисьёсты дасян-будэтон. Ольга Витальевна дэмлаз кутыны та луонлыкез но удмурт кылын вераськись нылпиосты ас дораз – театръя занятиосы – ӧтиз. Нимысьтыз тодматон ортчиз дышетонъя луонлыкъёсын. Со андройд платформа вылын ужась смартфонъёслы чаклам шудонъя пӧртэм ватсэтъёс, «Билингва» центрлэн нимлыко сайтэз. Семинар пумын анай-атайёсын вераськиз кык кылолыкъя ӵектосысь ӧнерчи, педагогика тодосъёсъя доктор, филологи тодосъёсъя кандидат, УдГУысь кылъя но литературая Институтысь лингвистикая кафедраысь профессор Ирина Борисовна Ворожцова. Семинар вакыт «Нуныкай» центрысь ӧнерчиос пиналъёс понна «Вӧйдыр» нимо крезьгуро шудон ортчытӥзы. Ужрадэз ортчытӥсьёс: кык кылолыкъя «Билингва» удмурт центр, #УдмуртКенеш» огазеяськон, Ижкарысь Эшъяськон юрт. Азьмурт грантъёсъя Фонд но Элькунысь йӧскалык политикая министерство юрттэм улсын. Ивор сётӥсь - «Билингва. О практиках формирования двуязычия в современной городской среде» ӵектослэн пресс-ёзэс. Кусып-герӟет - 89048304946 – Волкова Татьяна Геннадьевна, ӵектослэн кивалтӥсез, филологи тодосъёсъя кандидат.