Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

Кыккылолыкъя ХVII семинар Ижкарын Эшъяськон юртын ортчиз

XVII семинар Кыккылолыкъя «Место семьи в становлении и развитии речи ребёнка (с опорой на удмуртский язык)» нимо XVII семинар Элькунысь дышетӥсьёслэн но нылпи садъёсысь ӧнерчиослэн куремзыя ортчытэмын вал. Семинарез радъясьёсты но куноосты котьку сямен пумитаз Ижкарысь эшъяськон юрт.

Ужрад улсын анай кылэз дышетон ужпумъёсъя дышетӥсьёсын но анай-атайёсын кусып тупатон сярысь юанъёс эскериськизы; семья куспын кылдылӥсь шуг-секытъёсты сэрттон амалъёсты шараязы. Ӵектослэн кивалтӥсез Татьяна Волкова "Билингва. О практиках формирования двуязычия в современной городской среде" проектлэн азинскемез сярысь ивортон лэсьтӥз, быдэстоно луонлыкъёсын тодматӥз но ӵектослэн азинскыны луонлыкъёсыныз шараяз.

Кык кылын вераськись пиналъёслэн анай-атайёссы аръёс ӵоже люкам тодон-валанъёссы сярысь веразы. Пусйизы, Ижкарын та проектлэн ужамез улсын семьяын вордскем кылэз утёнлы сӥзем уж капчигес мынӥз шуыса. Малы ке шуоно, карын но трос калыко интыын анай кылын вераськыны луонлык кылдӥз. Крезьгуръя, эктонъя, киужен выронъя занятиосын, пӧртэм шудонъёс пыр анай кыл нылпилы матынгес луэ.

Кылъёсты дышетон амалъёс сярысь тодэ вайытӥз кыккылолыкъя ӧнерчи,педагоги тодосъёсъя кандидат Ирина Ворожцова.

Нимаз саклык висъямын вал анай кылэз гуртъёсын дышетонлы. Туннэ та ужпум тужгес но сюлэмшугъяськытӥсез луэ. Ӧнерчиос пусйизы, гуртъёсын туала тодон-валанъёс, ужан амалъёс уже уг кутӥсько. Ӵектослэн кивалтӥсез Татьяна Волкова котькуд вазиськем муртлы юрттыны дась луэмзэ вераз.