БилингваБилингвизмъя удмурт центр

«Удмурт нылпилы — удмурт выжыкыл!» видеоконкурс ялӥз «Удмурт нылкышно кенеш» огазеяськон. Ужрад Анай кыллэн калыккуспо нуналэзлы сӥземын. Со сярысь иворъёсъя «Удмуртия» агентстволы вераз «Удмурт нылкышно кенеш» огазеяськонлэн кивалтӥсез Надежда Степанова.

Ужъёсты 19-тӥ тулыспалозь огазеяськонлэн «ВКонтакте» мерлыко вотэсысь бамаз келяно.

«Ужъёссэс мед лэзёзы 19-тӥ тулыспалозь. Лайкъёсъя учком, кинлэн тужгес трос лайкъёсыз луозы «Удмурт нылкышно кенеш» группаын. Собере милям «Анай выжыкыл» группамы вань на. Отчы но со ужъёсыз поттомы. Нош куара сётон «Удмурт нылкышно кенеш» группаямы луоз. Со усьтэмын, мед пырозы, мед учкозы. Кудӥз выжыкыл кельшиз, отчы ик мед кельтозы лайксэс. Сыӵе малпанмы», — вераз конкурсэз радъясь.

Надежда Степановлэн верамезъя, конкурс пиналлы выжыкыл веран сямез улӟытон понна радъяське. Туала улонын угось туж ӧжытэз гинэ нылпизылы выжыкыл вера яке лыдӟе на.

«Егит анайёс адӟем мед карозы. Али уго уг лыдӟисько тросэз, азьло вераськом вал изён азьын выжыкыл пиналъёслы, соос уг но изё вал ай выжыкылтэк. Малпанэз но огшоры кадь, но кулэлыкез — люкам ке сое, адӟем карымон ке со луиз, сыӵе явлениез улӟытӥм ке выльысь, улонэ пыртӥм ке — умой луоз», — валэктэ Степанова.

Конкурсэ котькуд мылкыд карись пыриськыны быгатэ. Выжыкылэз мадёно пичи пиналлы шуыса, тунсыко, чебер удмурт кылын. Басьтыны луэ котькыӵе калыклэсь выжыкылзэ, но верано одно ик удмурт кылын. Со сяна, ас малпам выжыкылъёсты но мадьыны яра.

Тодэ вайытом, кылем арын «Анай выжыкыл» нимо видеоконкурс радъяськиз вал ини. Соку удмурт анайёс нылпизылы удмурт выжыкыл лыдӟизы но видеое пуктыса мерлыко вотэсэ келязы. Отчы ог дасо пала адями пыриськиз вал.

Ивортодэт кутэмын: Ивортодэтъя "Удмуртия" агентство