Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

Быдэ вуэмлы сӥзем «Эру» улоскуспо шулдыръяськон ортчиз Удмуртиын

Эру Удмурт егитъёслэн «Шунды» огазеяськонзы Шаркан ёросысь Тол Бабайлэн усадьбаяз «Эру» праздник ортчытӥз. Быдэ вуэмлы сӥзем егитъёс понна шулдыръяськон радъяськиз 29-тӥ но 30-тӥ инвожое. Люкаськизы оглом 12 командаос – Вавож, Кияса, Дэбес, Эгра, Шаркан ёросъёсысь но Татарстан элькунысь.

Егитъёсты ӟечкыланы вуылӥз Шаркан ёрос муниципал кылдытэтлэн тӧроезлэн нырысетӥ воштӥсез Владимир Марков, Шаркан ёрослэн дано улосчиез Александр Прохоров но Эшъяськон юртысь ӧнерчи Ксения Широбокова.

Ужрадлэн нырысетӥ нуналэз ортчиз Тол Бабайлэн резиденцияз. Отын пӧртэм пумо вожвылъяськонъёс радъяськизы: калык фольклоръя квест-шудон, «Визитка» но творчествоя номеръёс. Быдэ вуэмлы сӥзем «Эру» улоскуспо шулдыръяськон улсын тужгес усто парез быръён ортчиз - «Кык дыдыкъёсты». Соос но ӵошатскизы – удмурт эктонъя, карнанэн ву нуллонъя, ӵошен пу ваныдыны быгатэмзэс возьматӥзы. Бӧрысь, пияшлы кулэ вал лэсьтыны ӟус, нош нылашлы – черсӥськыны.

Йылпумъянъёсъя вормисе потӥз Шаркан ёросысь Кыква гуртысь команда, кыкетӥ инты – Зар-Вишуръёслэн, куинетӥ интые потӥз Татарстанысь команда. Котькудӥз дуно кузьымъёсын пусъемын вал.

Кыкетӥ нунал ортчиз Петуньки гуртын. Радъямын вал командаослэн азьветлӥсьёсынызы котырес ӝӧк сьӧрын кенешон но пӧртэм мастер-классъёс.