Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

"Билингва" проект сярысь Калыкъёслэн Эшъяськон юртазы Этно-пресс-клублэн пумиськоназ вераськизы

Этно-пресс-клуб Пӧртэм калыкъёс сярысь гожъясь газетчиос ужазы ӵем пумиськылӥсь йӧскалык юанъёс пумысен кенешизы 17 толшре выль площадкаын. Нырысетӥ ужрадын эскеризы билингвизмез – кык кылэз огкадь умой тодонэз, солэсь аспӧртэмлыкъёссэ.

Пумиськонэ вуэм куноос азьын Эшъяськон юртлэн кивалтӥсез Татьяна Боталова пусйиз, калыкъёслэсь кылъёссэс утьыны кулэ, югдурез СМИ-осын быгатыса возьматоно, калык кусыпъёс сярысь верано-гожъяно. Озьы ик кивалтӥсь пресс-клублэн азинлыкез сярысь ивортӥз, мар возьмано выль огазеяськонлэсь. Татьяна Боталова Элькунысь йӧскалык ужпумъёсты мургес эскерон вылысь пресс-клубе пыриськисьёслы асэныз калыкен пумиськыны дэмлаз. Кылсярысь, гужем толэзьёсы бесерман гуртъёсы потаны.

«Мынам Удмуртие» телерадиокомпаниысь журналист, Ижкарысь йӧскалык куспо журналистикая школалэн кураторез Константин Ижболдин пӧртэм калыкъёсын герӟаськем ужпумъёсты СМИ-осын веран-возьматон сярысь малпанъёссэ шараяз: «Та ӧръя гожъяськись тужгес но сак луыны кулэ, зэмос ӧнерчи. Котькуд юан сётон азьын калыкен, солэн лулчеберетэныз но сям-йылолъёсыныз тодматсконо».

Пумиськонын эксперт чотын вераськизы мерлыко огазеяськонъёслэн ёзчиоссы но студентъёс – кин билингвизмлэсь аспӧртэмлыксэ ас вылаз тодэ-шӧдэ. Кык кылолыкъя центрлэн ужез сярысь вераз Татьяна Волкова. Со Азьмурт грантъёсъя фондэн ялэм вожвылъяськонын вормем «Билингва» ӵектослэн кивалтӥсез луэ (проект бадӟым саклык висъя карын улӥсь нылпиосты кык кыллы огдыре дышетонлы). Татьяна Волкова уж борды кутскемзы сярысь вераз – нырысь радъяськизы семинаръёс анай-атайёс понна, кудъёсыз шугъяськизы пиналзылы удмурт кылэз дышетыны. Со вакытлы нимлыко сайт гинэ кылдытэмын вал. Бӧрысь ӵектос интернет вотэсбамысь кык кылолыкъя зэмос школалы пӧрмиз.

Туннэ семинар радъян борды Элькунысь ёросъёс но итӥськизы, кык кылэз тодӥсь нылпиос понна «Нуныкай» огъет рос-прос ужаны кутскиз, ӵектослэн азьветлӥсьёсызлэн кичӧлтэмзыя смартфонъёс понна нылпиослы буяськонъя «Чибори» нимо нимысьтыз ватсэт кылдытэмын.

Журналистъёсын пумиськонэ ӧтемын вал йӧспортэм адями – 4 кылъёсты тодӥсь полиглот, элькунысь азербайджан калыклэн «Достлуг» огазеяськонзылэн Шаркан ёросысь ёзэтэзлэн кивалтӥсез Ахмет Ахмедов. Пинал вакытаз Удмуртие вуыса со улонзэ весяклы элькунэнымы герӟаз. Воргорон соку аслыз вераз, со татын улӥсь калыклэсь кылзэ одно тодоз, дышетоз шуыса. «Мынам атае фронтэ ветлэмын, трос кылъёсты тодэ вал. Котьку вералляз – котырад улӥсь калыклэсь кылзэс тодоно. Соку эшлыко но капчи кусыпъёс луозы, ваньзы ӟеч улозы» - тодаз вае Ахмет.

Озьы ик пумиськонэ пыриськизы УдГУ-ысь удмурт филологияя, финно-угроведениея но журналистикая институтысь студентъёс Анна Кадрова но Анастасия Пивоварова. Нылъёс веразы кык кылэз тодэмзы мукетъёссэ но капчиен дышетыны луонлык сётэ шуыса. Али соос англи, француз но мадьяр кылъёсты дышето.