Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

2 инвожое кыккылолыкъя семинар но нылпиослы сӥзем праздник радъямын луозы

Билингва а13 «Билингва. О практиках формирования двуязычия в современной городской среде» ӵектос улсын 2-тӥ инвожое Ижкарысь Эшъяськкон юртын кыккылолыкъя семинар ортчоз. Пиналъёс понна нылпиосты утён Нуналлы сӥзем шулдыръяськон чакламын.

Тодады вайтом, «Удмурт Кенеш» огазеяськонлэн «Билингва. О практиках формирования двуязычия в современной городской среде» ӵектосэз миым Азьмурт грантъёсъя Фондэн ялэм вожвылъяськонын вормисе потӥз. Грант юрттэм улсын туэ 4 семинар радъяськиз ини.

Матэктӥсь семинарлэн пуштросэз – «Вераськон кусыпъёс: валтӥсь ужпумъёс, ужан радлык но амалъёс». Семиранэз радъясьёс верамъя, ужрадэ пыриськисьёс вераськон кусыпъёсты тупатонъя амалъёсты шудонъёс пыр эскерозы-возьматозы. «Анай-атайёсын но нылпи садъёсысь ӧнерчиосын вераськон кылэз азинтонъя куд-ог шуг-секытъёс сярысь кенешом, эскером соосты палэнтон амалъёсты», - пусъе семинарлэн модераторез, педагоги тодосъёсъя доктор, профессор Ирина Ворожцова. Семинаре пыриськисьёслэн юанъёссылы валэктон сётозы ӵектосын ужась психологъёс Ольга Смирнова но Татьяна Кудрявцева.

Семинар мынон вакытэ покчиос понна ужалоз нылпи площадка, сое котьку сямен радъяло «Нуныкай» центрысь ӧнерчиос.

Ужрад йылпумъяськем бӧрсьы вань мылкыд карисьёсты ӧтё нылпиосты утён Нуналлы сӥзем шулдыръяськонэ. Ӵектослэн кивалтӥсез Татьяна Волкова пусъемъя, праздник – ӝыны ар ӵоже «Нуныкай» центрын дышетскемлэсь емышъёссэ возьматыны умой муг луэ. Кылсярысь, театръя студие ветлӥсь нылпиос со нуналлы спектакльзылэсь премьеразэ дасяло. Эшъяськон юртлэн сцена вылаз «Репка» выжыкылэз туала сямья пуктозы, удмурт кылын. Пиналъёс понна озьы ик тунсыко дышетскон-шудон программа чакламын.

Празднике ӧтемын нылпи творчествоя вожвылъяськонъёсын вормисьёс – «Вить дуно кылъёс» но «Билингва-TV». Та аспӧртэм конкурсъёс озьы ик «Билингва. О практиках формирования двуязычия в современной городской среде» ӵектос быдэсъяськем улсын ортчизы, элькунысь йӧскалык политикая министерство юрттэм улсын.

Семинар кутскоз 10 часын, шулдыръяськон люкетэз – 11 часын (Ижкар, Орджоникидзе урам, 33 «А»).

Нылпиосты утён Нуналлы сӥзем шулдыръяськонэз но семинарез радъясьёс – «Удмурт Кенеш» огазеяськон, кык кылолыкъя «Билингва» удмурт центр, Ижкарысь Эшъяськон юрт, Азьмурт грантъёсъя Фонд но йӧскалык политикая министерство юрттэм улсын.