БилингваБилингвизмъя удмурт центр

Калыкъёслэн Эшъяськон юртазы 16 толсуре Кыккылолыкъя XI семинар ортчиз.

Таяз учыре семинаре ӧтемын вал Кыккылолыкъя "Билингва" удмурт центрлэн семинаръёсаз (проект азинскиз Удмурт Элькунысь йӧскалык политикая министерстволэн юрттэмезъя), "Анай клублэн" пумиськонъёсаз (анай-атайёслэн мылкыд каремзыя но тыршемзыя азинскись проект) но "Нуныкай" кыккылъем нылпиослэн центразы радъям занятиосы (Ижкар администрацилэн но "Удмурт Кенеш" огазеяськонлэн юрттэмзыя азинскись проект) 2017 арын ветлэм анай-атайёс но нылпиос. Семинаре 33 удмурт семья пыриськиз (регистрациез ортчем семьяосты лыдъяса).

Семинарез радъясьёс: Кыккылолыкъя "Билингва" удмурт центр, Удмурт Элькунысь йӧскалык политикая министерство, Калыкъёслэн Эшъяськон юртсы.

Семинарын 2017 арын кыккылолыкен герӟаськем азинскись ӵектосъёс пумысен анай-атайёс мылкыдъёссэс вераса потӥзы:

• Кыккылолыкъя «Билингва» центрлэн семинаръёсаз, "Нуныкайлэн" занятиосаз но "Анай клублэн" пумиськонъёсаз удмурт нылпиослы, анай-атайёслы тодматскыны, ог-огенызы вераськыны-кенешыны луонлык кылдӥз;
• удмурт кылын нуэм занятиос пыр нылпиослэн дунне валанзы паськыта;
• трос умой кылъёс верамын ӧнерчиослэн ужамзы пумысен;
• «Нуныкае» но "Билингвалэн" семинаръёсаз ветлыса, пиналъёс удмурт кылэн но удмуртлыкен тунсыкъяськыны кутскизы: нылпиослэн занятиосы ветлэмзы потэ, удмурт кылын вераськемзы потэ.

Тырмымтэос но шараямын вал. Одӥгез соос пӧлысь дырен герӟаськемын вал: куд-огез пумиськонъёсты кӧснунал интые арня шорын ортчытъяны кулэ вылэм шуыса веразы. Мукетыз - реклама туж ӧжыт.

Ӵектонъёс сярысь верано ке, одӥгез, кылсярысь, театр кружок усьтыны куронэн герӟаськемын. Озьы ик калык эктонъёслы дышетскыны мылкыд каро. Со сяна Кыккылолыкъя "Билингва" удмурт центрлэн сайтаз анай-атайёсты "Удмуртия" книга поттонниын поттэм выль книгаосын но шудонъёсын тодматон радъяно шуыса веразы. Арнянуналэ дэмлало школае ветлӥсь нылпиослы удмурт кылын школаын кадь дышетскон урокъёсты радъяны: лыдӟиськон урокъёсты, математикая, дуннеен тодматскон но мукет.

Озьы ик семинаре люкаськемъёс ӵектосъёсты азинтӥсьёслы трос тау кылъёс веразы, асьсэос но удмурт кылэз вӧлмытон борды мыло-кыдогес басьтӥськыны мылкыдзэс шараязы.