Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

Вавожын анай кылэз дышетонъя но кыккылолыкез азинтонъя юанъёсты эскеризы

Семинар в Вавоже

18 толшоре Кык кылолыкъя «Билингва» огъет Вавож ёросэ вуылӥз. Пумиськон ортчиз ёрос администрацилэн юртаз, ужрадэ пыриськизы Вавожысь пӧртэм калыкъёслэн мерлыко огазеяськонъёссылэн ёзчиоссы, лулчеберетъя ужъюртъёсысь ӧнерчиос но ёрос администрациын ужасьёс. Люкаськем калыклэн юанъёсызлы валэктон сётӥз но мерлыко огазеяськонъёсын ужан амалъёс сярысь вераз Элькунысь йӧскалык политикая министр Лариса Буранова.

Пумиськон улсын ужаз кык площадка. Кыллы сӥзем кенешонын вераськон мынӥз муниципал кылдытэтын удмурт кылэз азинтон амалъёс сярысь, кык кылолыкъя ужпумъёсты эскеризы. Кык кылолыкъя «Билингва» огъетлэн кивалтӥсез Татьяна Волкова центрзылыэн уженыз тодматӥз. «Билингва» удмурт кылэз дышетон ӧрын паськыт луонлыкъёс кылдытэ. Кылсярысь, удмурт но ӟуч кылъёсты огвакытэ дышетонлэн пайдаез сярысь вера. Тодады вайтом, «Билингва» ӵектос Азьмурт фондэн ялэм вожвылъяськонын грант утӥз. Коньдон висъямын карын улӥсь нылпиосты огдыре кык кыллы дышетонъя амалъёсты уже кутонлы.

«Удмурт нылкышно кенеш» огазеяськонлэн кивалтӥcез Надежда Степанова дэменлыксылэсь удмурт кылэз азинтонъя вормонъёссэс но ужан амалъёссэс шараяз.

Пумиськонын озьы ик ортчиз «Школа – удмурт лулчеберетъя огъет» ӵектосэн тодматскон. Со сӥземын анай кылэз азинтон ужпумлы. Проект ужа Вавож ёросысь Бия гуртысь дышетсконниын. Семинаре пыриськисьёс ужлы вылӥ дунъет сётӥзы, ужлэсь ӟечсэ пусйизы. Куд-ог янгышъёс бордын ужано палъёссэ шараязы, выль амалъёсты дэмлазы.