Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

Мон тодӥсько анай кылме!

акция Мон тодӥсько анай кылме!

«Билингва» центрлэн «Мон удмурт сямен вераськисько» акциез мытэмын вал Анай кыллэн нуналаз, 21-тӥ феврале. Нош та нуналъёсы акцилы йылпумъянъёс лэсьтэмын. Акция ортчиз "Билингва. О практиках формирования двуязычия в современной городской среде" проектлэн азинскемез улсын (проект Азьмурт грантъёсъя фондлэн юрттэмезъя улонэ пыӵа).

Нырысь ик пусъёно, акцие пыриськизы удмурт огазеяськонъёс но нимаз адямиос, егитъёс но мӧйыос, огшоры ужасьёс но бадӟым кивалтӥсьёс, вань мылкыд карисьёс.

«Мон удмурт сямен вераськисько» акция азьын кӧня ке ужпум сылӥз, - пусъе «Билингва» проектлэн валтӥсез, филология наукаосъя кандидат Татьяна Волкова, - Нырысь ик, удмурт кылэн тунсыкъяськисьёслэн, сое дышетыны мылкыд карисьёслэн лыдзы мед будоз, кыкетӥез, адямиос мед валалозы анай кылэз тодонлэсь кулэлыксэ. Юромо акция понна лэсьтэмын вал 400 значокъёс. Та дыр ӵоже соос Удмуртиысь вань ёросъёсы но каръёсы вуизы. Та значокез бырттылӥзы тужгес мыло-кыдоослэн, анай кылзэс дышетыны мылкыд карисьёслэн, гадязы.

Акцилы кутскон сётӥз Вань удмуртъёслэн «Удмурт Кенеш» огазеяськонзы. К. Герд нимо гимназиысь 1-тӥ классын дышетскисьёс Эвика Кузьмина но Арсений Волков гадязы «Мон удмурт сямен вераськисько» значок бырттыса вамыштӥзы Удмуртиысь парламентлэн юртаз. Татын соос «Удмурт Кенеш» огазеяськонлэн кивалтӥсеныз Татьяна Ишматоваен ӵош пумиськылӥзы Кун Кенешлэн Тӧроеныз Алексей Прасоловен. Нылпиос спикерлы Удмуртиысь калык поэтлэсь Ф. Васильевлэсь анай кыллы сӥзем кылбурзэ удмурт но ӟуч кылъёсын лыдӟизы, значок кузьмазы. Алексей Михайлович акциез ӟечен пусйиз, нош нылпиослы вераз: «Тӥ - шудоесь, тӥляд кык анай кылды – удмурт но ӟуч». Та нуналэ ик пиналъёс вуылӥзы Удмуртиысь Тӧролэн но Правительстволэн администрацияз, пумиськылӥзы солэн кивалтӥсеныз Сергей Смирновен. Сергей Витальевич озьы ик бадӟым тау кариз нылпиослы анай кылынызы тунсыкъясько, культуразэс утё шуыса. - Асьмеос огъя кариськыса нылпиосмылэсь патриотизм мылкыдзэс бурдъяны кулэ, - «Билингва» проектэз валтӥсьёслы но «Удмурт Кенеш» огазеяськонлы вазиськыса, шуиз Сергей Витальевич, - анай кылзэс пичиысен гажаны мед дышозы, ӟуч-а со, удмурт-а, яке кыӵе ке мукет кыл-а. Кыл – со адямилэн лул пуш дуннеез ук.

«Мон удмурт сямен вераськисько» акция, Ижын кутскыса, пумен-пумен выжиз ёросъёсы. Биньгозыез мыло-кыдо кутӥзы ёросысь активистъёс, удмурт движение пыриськисьёс. Тужгес мыло-кыдоосыз гадязы нимысьтыз значок бырттыса, туспуктэмъёссэс социальной сетьёсы интыязы. Гадь вылысьтызы тунсыко значокез адӟыса, куд-огез татын ик куриз ни: «Нош кытысь сое басьтыны луоз? Мон но нуллысал, мынам но потэ вераме но возьматэме: мон тодӥсько анай кылме...».

Тросаз ёросъёсын акцилэн бурд улаз анай кыллы сӥзем пӧртэм конкурсъёс, ӵошатсконъёс ортчизы. Значокъёсты сётъязы вормисьёслы гинэ. «Билингва» проектлэн валтӥсьёсыз верамъя, «Мон удмурт сямен вераськисько» акция тросэзлы тунсыко потэм, али но ай мыло-кыдоос сыӵе гожтэмен значок куро. Кин ке тодмоезлэсь адӟем, кин ке интернетысь синйылтэм. Но значок – со пус гинэ, валтӥсез – мар тынад пушкад, мылкыдад. Акция дыръя ӵем гинэ чузъяськиз юан: «Малы тӥ анай кылыныды вераськиськоды?» Солы валэктыса, уноез тодазы вайизы Удмуртиысь калык кылбурчилэсь, Ф. Васильевлэсь верамзэ: «Аслэсьтыд кылдэ яратытэк, мукетсэ уд дышы гажаны». «Мон удмурт сямен вераськисько» акция анай кылзэс гажасьёс понна выль мылкыд сётиз. Со бурдъяськем мылкыд одӥг нуналэн но, кык толэзен но уг лыдъяськы.

Алнаш

Кылэз дунъясьёслы - синпель. «Билингва» проект чотын поттэм «Мон удмурт сямен вераськисько» значокъёс нырысь ик вуизы Алнаш ёросэ.

Татысь «Удмурт Кенешлэн» ёзэныз кивалтӥсь Галина Павлова пусъе, значокъёсты тужгес но мыло-кыдо удмурт егитъёслы кузьмано кариськизы. Акция радъяськиз Алнаш ёросысь Мукши школаын Николай Васильев писательлы но кылбурчилы сӥзем 3-тӥ лыдӟонъёс дыръя. Та конференцие пыриськизы Ижысь, Алнаш, Пичи Пурга, Можга ёросъёсысь, Татарстанысь Енабердино гуртысь куноос - журналистъёс, писательёс, удмурт кылъя но литературая дышетӥсьёс, школаын 7-тӥ - 11-тӥ классын дышетскисьёс. Нылпиослы чаклам секциын Н. Васильевлэсь творчествозэ эскерем сяна, ужазы на нимысьтыз подсекциос: егит поэтъёс, кылысь кылэ берыктӥсьёс, егит композиторъёс, эскерисьёс но мукет. «Мон удмурт сямен вераськисько» значокъёс кузьмамын вал анай кылынызы гожъяськись пиналъёслы - егит кылбурчиослы.

Галина Юрьевналэн верамезъя, та пиналъёс азьланяз удмурт кылэз эшшо ӟечгес тодыны тыршозы, угось соос пӧлын но луозы, вылды, удмурт литератураез, чебырлыко анай кылмес утисьёс но азинтӥсьёс.

Якшур-Бӧдья

Кыӵе девизъя уло егитъёс? Анай кылэн герӟаськем ужрадъёсы якшур-бодьяос котьку мыло-кыдо пырисько. Озьы «Билингва» центрен но «Удмурт Кенеш» огазеяськонэн ялэм "Мон удмурт сямен вераськисько" акция но ваньзылэсь мылкыдзэс бугыртӥз.

Ёросысь «Удмурт Кенеш» огазеяськонлэн кивалтӥсез Вера Вахрушева пусъе: - "Мон вераськисько удмурт сямен" кылъёс тросэзлы девиз кадь луизы. Озьы ми "Ошмес" газетамы ялӥмы анай кыллы сӥзем "Зарни кыл чуръёсы" конкурс. Мӧйыос но пиналъёс но К. Гердлэсь кылбуръёссэ лыдӟизы, дунъясь комиссилы видеооссэс лэзизы. Ваньзэ учкем-дунъям бере, ми со видеоосты "Вконтакте" вотэс бамамы но поттӥмы. Вормисе потӥзы Мукши школаысь пичи классъёсты дышетӥсь Надежда Кузнецова но Ӵошкыт школаын дышетскись Кристина Кузьминых.

Ӵошатсконэ пыриськисьёслы «Билингва» центрлэн «Мон вераськисько удмурт сямен» значокъёсыз кузьмамын вал. Сыӵе ик гадьпус сётэмын Сюровайысь туж мыло-кыдо, визьмо но чупрес пияшлы Владислав Волковлы. Удмурт кылъя дышетӥсеныз Елена Байкузинаен соос ог-огзэсты валаса ужало. Ӵем гинэ пӧртэм темаосъя эскерон ужъёс удмурт кылын гожъяло, конференциосы пыриськыло. Ми оскиськом, азьланяз Владиславлэн но анай кылзэс дунъясь мукет нылпиослэн но ваньмыз ӟеч гинэ луоз.

Шаркан

«Зангари» удмуртгес кариз. Ёросысь егитъёсын ужанъя «Зангари» центрын «Билингва» проектэн ӵош валаны тыршизы: малы адямиос анай кылзэс дышето?

Шарканын «Мон удмурт кылын вераськисько» акция борды басьтӥськизы егитъёс. Ульчаосы вамыштыса, соос адямиослэсь юалляськоно кариськизы: малы соос дышето яке уг дышето анай кылзэс. Юалляськемъёсты видеое гожъязы. «Удмурт Кенеш» огазеяськонлэн Шаркан ёросысь ёзэныз кивалтӥсь Елена Перевозчикова пусйиз: - Юаляськон адямиослы тунсыко потӥз. Куд-огез ӧз ватэ, анай кылзэс урод тодо, акцентсы вань, соин ик уг верасько шуыса, нош куд-огез али ик дась кылзэс мургес дышетыны. Оглом ваньмызлэн анай кыл шоры учконзы туж шуныт.

Шаркан ёросын «Билингва» центрлэсь «Мон удмурт сямен вераськисько» значокъёссэ сётъязы анай кылзэс лябгес тодӥсьёслы. Но табере, пе, соос удмурт кылзэс ӟечгес тодыны тыршозы.

Материалэз дасяз Е. Миннигараева