Билингва — Юан

Юан - веран

=================================================

Кыккылолыкъя юанъёсты Тӥ "БИЛИНГВА" Кыкылолыкъя удмурт центрысь ӧнерчиослы электронной почтая сётыны быгатӥськоды: udmbilingva@yandex.ru

Юан: Мынам пиелы али 14 арес, солэн удмурт кылэз дышетэмез потэ. Мар мыным, карын улӥсь анайлы, лэсьтыны кулэ, пиелэн удмурт кылэз дышетыны мылкыдыз медаз быры шуыса. (Оксана М.)

Веран: Кызьы карын улӥсь пиналлэсь удмурт кылэз дышетонлы мылкыдзэ пуромытыны? Котькуд учыре та юанлы пӧртэм валэктон сётыны луоз. Угось, карысь вань школаосын удмурт кылэз уг дышето бере, котькудӥзлэн пӧртэм луонлыкъёсыз аслэсьтыз анай кылзэ дышетыны. «Та кылын тынад анаед но атаед верасько» шуыса веранъёс гинэ егит муртлы кылэз дышетон понна оскытӥсесь уз луэ. Солы валамонгес луоз кыллэсь зэмос улонын кутӥськемзэ шӧдон.

Та муген ик, сётэм юанлы валэктон утчаку, тужгес но пайдаё луыны быгатоз пиналлэн «Шундыкаре» яке мукет та выллем удмурт пиналъёс понна нимысьтыз ортчытӥськись лагере пыриськемез. Озьы егит мурт ас вылаз шӧдоз удмурт кыллэсь туала улонысь интызэ, тодматскыны быгатоз удмурт лулчеберетэн но удмурт калыклэн историеныз. Кызьы возьматэ улон, ваньмыз со егит муртлэсь удмурт кылэз дышетыны мылкыдзэ пуромытэ. Озьы ик пайдаё луоз, анай-атайёс пиналъёссэс шаерамы ортчись удмурт кыллы, литературалы, лулчеберетлы сӥзем вожвылъяськонъёсы пыриськыны ӝутказы ке. Та выллем ужрадъёсын егитъёс удмурт кылэн тунсыкъяськись ёзъёсынызы тодматско, соосын кусыпъёс радъяло, озьы бере, удмурт кылзэс уже кутыны луонлыкъёссы но будо.

Юан: Мон ачим удмурт луисько ке но, удмурт кылын уг вераськиськы. Кыӵе амалъёсты уже кутыны луоз, удмурт кылэз дышетон понна? Луоз-а удмурт кылэз дышетыны пиналэным ӵош? (Ирина В.)

Веран: Кылъёсты дышетыны луэ котькыӵе арлыдын. Но котькудӥзлы арлыдлы аслыз тупамон куронъёс пуктӥсько. Со сяна, пӧртэм адямиослы пӧртэм методикаос тупало. Но котькудӥзлы тупамон дэмланъёс пӧлы пыртыны луоно таӵеоссэ:

Кылэз дышетонлы нуналлы быдэ 20–30 минут висъяно. Вераськонлэсь но гожъяськонлэсь вань удысъёссэ азинтон бордын ужано: гожъялэ пичиесь текстъёс, лыдӟелэ капчиесь статьяосты, кылзэлэ иворъёсты. Вераськыны быгатонлыкъёстэс азинтон понна, удмурт кылэз тодӥсь эшъёсыныды удмурт кылын вераське. Кыл сӧзнэтысь выль тодон-валанъёс басьтэмды бере, соосты одно ик вераськонады но гожъяськонады уже кутыны тырше. Кылсярысь, дасо пала выль кылъёсты дышетӥды ке – со кылъёсты уже кутыса, вакчияк верос гожтэ. Ортчем дыр кылкабъёсын тодматскиды ке – азьвыл ортчем ужрадъёс сярысь гожтэ яке ивортэ.
Выль кылэз дышетон борды басьтӥськем муртъёслэн тужгес но ӵем пумиськылӥсь янгышсы – огвакытэ ик пӧртэм темая информациен ужаны тыршон. Таӵе амалэн басьтэм тодон-валан туж шуген нимысьтыз сӧзнэтэ биниське, озьыен, кылэз дышетонын но ӵем дыръя азинсконэз уг адӟисьькы.
Азьвыл дышетэм материалэз, кӧня ке дыр ортчыса, выльысен тодэ вайылоно. «Та зэ темаез йырам туж умой возисько на» шуыса малпан кылдӥз ке но, выльысен асьтэдыз асьтэос эскере. Дышетэм материалэз тодэ ваён нокинлы мултэс ӧй вал на.

Кылэз дышетон ласянь та выллем дэмланъёс тупамон луозы кызьы пиналъёслы, озьы ик будэ вуэмъёслы но. Арлыдъя пӧртэмлыкез шӧдӥськоз дышетоно кылъёслэн пуштроссы вылын но занятиез ортчытон амалъёс вылын.

Юан: Кызьы азинтӥське пиналлэн анай кылызлы но ас калыкезлэн лулчеберетэзлы тунсыкъяськонъёсыз? (Андрей К.)

Веран: Психологъёслэн чакламзыя, этносъеслэн пӧртэмлысы но астэ кыӵе ке нимаз калыкен герӟан мылкыд пиналъёслэн 3–4 аресысенызы ик ӝужа ини. Нырысь-валысь со шӧдиське материальной культуралэн пӧртэмлыкъёсыз вылын. Малы, шуом, эшелэн анаез чак-чак пӧра, нош асьмеос ум? Яке малы кыӵе ке но праздникысен песянае аспӧртэмлыко дӥсь дӥсяз? Малы артын улӥсь пияш тюбетейкаен ветлэ? Таӵе малыос пыртӥ котькудӥз пинал аслаз калыкез сярысь нырысетӥ тодон-валанъёс басьтэ. Макем трос информация со та вакытэ басьтӥз, сокем ӟечгес пыӵалозы солы анай-атаезлэн калык сям-йылолъёсыз. Озьы анай кылыныз ӵош пиналлы 6–7 аресозь пыӵа вордскем калыкез сярысь нырысетӥ тодон-валанъёсыз. Макем чылкыт но рос-прос вераськид та вакытэ нылпиен анай кылыныз, сокем тросгес луонлыкъёсыз кылдо пиналлэн будэм бераз огкадь чебер вераськыны кык кылын – удмурт но ӟуч, нош азьланяз – эшшо уно кунгожсьӧр кылъёсты дышетыны. Угось котькудӥзлэн кыллэн йырвизьмын аслаз сӧзнэтэз – системаез. Вань трос примеръёс, куке пиналъёсты ӟуч будэтыны тыршыса, анай-атайёс соосын акцентэн ке но, ӟуч кылын верасько. Жаляса верано, таӵе пиджинэз бӧрысь тупатыны туж но туж шуг ни. Озьы бере, таӵе пиналэз пичи дырысеныз ик асьмеос, бадӟымъёс, азинлыко луэмлэсь палэнтӥськомы.

Швейцар тодосчи Ж. Пиажелэн верамезъя, калык асваланлэн азинсконэзлэн кыкетӥ вакытэз герӟаськемын 8–9 аресъёсын. Таяз учыре нылпилэн асваланэзлы инъет луэ ни вордӥськем шаер, анай-атайлэн национальностез. Анай кыл – со пиналлэсь сюлэмзэ, шумпотонзэ но куректонзэ усьтыны юрттӥсь кыл. Анай кыллэн шунытэз асьмелы пӧртэм шуг-секытъёсты вормыны юрттэ. Юнме шорысь ӧвӧл, дыр, психологъёслэн верамзы но: начальной школаын тужгес но яратоно дышетӥсь – со анай кылъя дышетӥсь, угось солы вань малпанъёсты усьтыны луэ.

11–12 арескысен калык асваланлэн инъетэз воштӥське. Ас калыкед сярысь нимаз тодон-валанъёс палэнэ кылё. Нырысетӥ интые пуксе пиналлы авторитет луись муртъёслэн дунъетсы. Кызьы дунъяло мон котырын улӥсьёс удмурт лулчеберетэз, удмурт калыкез? Та юанлы пиналлэн ӧвӧл на аслаз валэктонэз, соин ик со утча сое артысь эшъёсызлэсь, анай-атаезлэсь, дышетӥсьёсызлэсь. Дырыз дыръя шеде ке сыӵе мурт, кудӥз пиналлы ас калыкеныз данъяськон мылкыд пыӵатоз, туж ӟеч. Нош ӧз ке? Сыӵе дыръя пинал быдэс улонэзлы маргинал кыльыны но быгатэ.

Та дуннеысь астэ ачид утчан кыстӥське шор школаез йылпумъятозь. Та вакытэ тросэз пиналъёс дасесь ӧвӧл на мукетъёсызлэсь висъяськыны. Йӧспӧртэм луоно ӧвӧл – быдэ вуымтэослэн валтӥсь девиззы. Валамон ни, егитъёслэсь асваланзэс будэтон понна, татын нош ик валтӥсь инты басьтэ анай кылъя но литературая дышетӥсьлэн образэз. Луиз ке со пиналъёслы тунсыко, адӟем карымон – егитъёс удмурт кылын тунсыкъяськозы, анай кылзэс гажалозы но яратозы. Нош ӧз ке – дышетӥсьсы пыр пумит султозы быдэс удмурт кыллы но лулчеберетлы. Со сяна та вакытэ тужгес но кулэ анай кылын радъяны сыӵе ужрадъёс, кытын пиналъёс асьсэды пӧртэм ӵошатсконъёс пыр усьтыны быгатысалзы. Аслад калыкеныд но кылыныд герӟаськем ужрадъёсын вормонъёс басьтон – пиналлэсь асваланзэ ӝутыны юрттэм сяна, солэсь выль тодон-валанъёс басьтыны мылкыдзэ пуромыто.

Озьыен, 16–17 ареслы котькудӥзлэн пиналлэн дунне шоры аслаз учконэз но йӧскалык шӧдонэз радъяське. Озьы ке но, шуыны уг луы, аръёс ортчемъя, йӧскалык шӧдон уг воштӥськы шуыса. Тодосчиос верамъя, ас калыкеныд зэмос герӟеттэ шӧдон понна, тон одно ик солэсь кылзэ, лулчеберетсэ азинтон понна маке но лэсьтыны кулэ.

Юан: Ма кароно, пиналы удмурт кылын мед вераськоз шуыса? Семьяямы мон гинэ, пиналлэн анаез, удмурт кылын вераськисько. Атаймы удмурт кылэз уг тоды. (Вероника М.)

Веран: Нылпиослэсь кыккылолыксэс кылдытон но азинтон понна таӵе дэмланъёс сётыны луэ: 1. Пиналды кык кылын мед вераськоз шуыса, кылъёслы дышетон амалъёстэс эн вошъялэ, тырше одӥг сюрестӥ мыныны: «анайлэн одӥг вераськон кылыз – атайлэн мукет вераськон кылыз», «инты но дыр», «семья куспын кутӥськись кыл» стратегиосты бырйиды ке, соослэсь эн куштӥське ини.

2. Нылпилы ӵемгес вералляно, кыӵе умой но кулэ туала вакытэ кык кылэз тодыны.

3. Кылъёслы дышетсконэз каньыл но шулдыр карыны тырше, кыкеныз но кылын гожтэм книгаос басьялэ но нуналлы быдэ лыдӟе. Нылпидэс азинсконъёсыз но выль дышетэм кылъёсыз понна ушъялэ.

4. Кылэз дышетонын пӧртэм амалъёсыз уже кутыны тырше: кырӟанъёсты, книгаосты, шудонъёсты.

5. Кыкеныз но кылъёсын вераськись муртъёсын – нылпиосын но арлыдо муртъёсын – вераськон муг но дыр шедьтыны тырше. Куное ӧтьылэ, сюрес вылэ поталэ, кык кылын ортчись ужрадъёсы ветлэ но мукет.

6. Нылпидэс вераськоназ лэсьтэм янгышъёсыз понна эн тышкаське, солэсь вераськонзэ волятыны но кылшыкыссэ узырмытыны тырше.

7. Кыксэ но кылъёсты дышетыны пӧртэм луонлыкъёс утчалэ: гужем лагерьёс, шудон группаос, арнянуналъёсы дышетскон.

8. Кыл дышетонэз нимаз эн висъялэ, тырше сое лулчеберетэн огазеяса сётыны.

9. Пиналлэсь кылшыкыссэ узырмытон понна, соин трос вераськыны кулэ, угось ачиз вераськыса гинэ пинал вольыт но чебер вераськыны дышоз.

Юан: Пиналылэн удмурт кылын вераськыны мылкыдыз вань ке но, кылшыкысэз узыр ӧвӧл. Кызьы солы юрттоно? (Алексей Григорьевич)

Веран: Чылкыт но вольыт вераськон понна, пиналлэн узыр кылшыкысэз луоно. Тодосчиослэн верамзыя, одӥг но ӝыны аресъем пинал 50 пала кылъёсты тодэ. Нош вить арес тырмыкуз, пинал аслаз вераськоназ 2000–2500 пала кылъёсты уже кутэ ни, соосты шонер кылкабе пуктыса вераське. Озьыен, пинал азинлыко мед дышетскоз шуыса, нылпи садэ ветлон вакытаз ик нимысьтыз саклык висъяно пиналлэсь кылшыкыссэ узырмытон понна.

Пиналлэн азинсконаз лексикалы дышетон аспӧртэмлыкъёс

Пиналъёслэн йырвизязы кылё соосыз гинэ кылъёс, кудъёссэ соос артысь адямиоссылэсь тужгес ӵем кыло.

Асьсэ вераськоназы пиналъёс нырысь-валысь уже кутыны кутско макенимъёсты (существительной) но каронкылъёсты (глагол). Но со сяна пиналъёсты дышетоно мукет вераськон люкетъёсты но шонер уже кутыны.

Ӵем дыръя пиналъёс трос кылъёсты тодо-валало, но асьсэ вераськоназы соосты уже куто. Пассивной лексикаез активной лексикае выжытон – со эшшо одӥгез ужпум, кудӥз вылэ анай-атайёс саклык висъяны кулэ.

Кызьы ужано, пиналъёслэсь кылшыкыссэс узырмытон понна?

Нуналлы быдэ пиналлы пӧртэм текстъёс лыдӟоно. Лыдӟыкуды таӵе ужпумъёслы нимысьтыз саклык висъяно:

котькуд кылэз чылкыт но шонер верано, предложениосты шонер интонациен лыдӟоно;
котькуд тодмотэм кыллэсь пуштроссэ валэктоно. Дышетэм кылъёсты кӧня ке дыр ортчем бере выльысен пиналлы тодаз вайытылоно.

Книга лыдӟон пиналлэсь кылшыкыссэ узырмытоз, дышетсконаз азинлыко луыны юрттоз.

Пичи дырысеныз пиналэн ӵош лыдӟиськон азьланяз нылпилы ас понназ лыдӟиськон мылкыд пуромытоз. Нош лыдӟиськыса пинал шонер гожъяськыны но малпанъёссэ радызъя вераны дышетскоз. Угось лыдӟиськыку, нимысьтыз со вылэ саклык висъятэк но, пиналлэн орфографической быгатонлыкъёсыз азинско.
Пиналлэсь кылшыкыссэ узырмытон понна, нимысьтыз кыл шудонъёс ортчытъяны луоз, кылсярысь, дэмланы луоз таӵеоссэ:

«Проводник» – ураметӥ поръякуды, пиналдылы «проводник» луыны дэмлалэ. Тӥ синъёстэс кыниськоды, нош пиналды, котырысь улосэз шонер но яркыт суредаса, Тӥледыз азьпала нуыны кулэ.

Троссэ кыл шудонъёсты тупез уже кутыса ортчытъяны луоно:

«Нима пӧйшуръёсты» – дышетӥсь тупез пиналъёслы куштэ. Тупез дышетӥсьлы берыктыкуз, пинал кыӵе ке пӧйшурлэсь нимзэ вера. Кин тодаз вайыны уг быгаты, со шудонысь потэ. Та шудонэз пӧртэм темая («Гурт пудо-животъёс, тылобурдоос, писпу нимъёс но мукет) кылъёсты тодэ ваён понна уже кутыны луоз.

«Кин кытын улэ?» – дышетӥсь, тупез куштыкуз, пӧртэм юанъёс сётэ:

Кин нюлэскын улэ? – /кион, ӵушъял, ӟичы/.

Кин шурын улэ? – /чорыг, бака, мый/.

Кин азбарын улэ? – /атас, курег, пуны/.

Будэмзыя пиналъёслы секытэсьгес юанъёс сётъяны луоз. Соку, пиналлэсь кылшыкыссэ узырмытэм сяна, солэсь котырысь улос сярысь тодон-валанъёссэ но будэтыны луоз.

Та выллем шудонъёсты котькудӥз ачиз но малпаны быгатоз. Дырыз дыръя пиналлэн кылшыкысэзлэн азинсконэзлы саклык висъян азьланяз солы школаын дышетскыны юрттоз.

Юан: Мынам туж потэ, пиналы удмурт кылын мед вераськоз шуыса. Но мынам кузпалы та малпанлы пумит луэ. Ма кароно? Наталья С.)

Веран: Анай кыллэн аспӧртэмлыкъёсыныз пинал нырысьсэ ас семьяяз тодматске. Анай кылын чузъясько веттан гуръёс, анай кылын пиналэз мусояло, анай кылыныз пинал вера аслэсьтыз нырысетӥ кылъёссэ. Семьяын ог-огдэ валаса улон пиналлы улоназ азинлыко луыны юрттэ. Озьы бере, анай-атайлы валаны кулэ котькудӥзлэсь анай кыллэсь кулэлыксэ. Та учыре кузпалдылы тыршоно валэктыны, малы пиналлы кулэ анай кылэз тодэм.

Юан: Удмурт но ӟуч кылъёс пӧртэм кыл сӧзнэтъёсы пыро. Озьы бере, куд-огезлэн малпамзыя, умурт кылэз тодэм ЕГЭ сётыку люкетэ. Озьы-а со? (Ольга А.)

Веран: Кылэз тодэм ноку но, нокинлы но номыр аламазэ ӧз вайы на. Уно кылъёсты тодэм пиналлэсь малпаськон манерзэ азинтэ, кыл шӧдонзэ будэтэ. Озьы бере, пӧртэм кылъёсты дышетон пиналлэн дышетсконын кулэ луись быгатонлыкъёссэ азинтон понна пайдаё луэ, солэсь кылшӧдонзэ будэтэ.